प्रतिनिधी / धाराशिव
भाजप प्रदेशाध्यक्ष चंद्रशेखर बावनकुळे बुधवारी जिल्हा दौऱ्यावर येत आहेत. त्यांच्या दौऱ्यात धाराशिव लोकसभा मतदारसंघातील सर्वच सहा विधानसभा मतदारसंघाच्या निवडणूक तयारीचा आढावा घेतला जाणार आहे. त्यामुळे धाराशिव लोकसभा मतदारसंघावर भाजपचा डोळा असल्याचे स्पष्ट होत आहे. महायुतीच्या सूत्रानुसार धाराशिव लोकसभेची जागा शिवसेनेकडे आहे. अर्थात शिंदे गट या जागेवर दावा करू शकतो. मात्र भाजपने स्वबळावर तयारी सुरू केल्याने शिंदे गटाचे काय होणार, असा प्रश्न उपस्थित झाला आहे.
काही राज्यात नुकत्याच झालेल्या विधानसभा निवडणुकीत भाजपला दणदणीत विजय मिळाल्यानंतर भाजपचे बळ वाढले आहे. या पार्श्वभूमीवर भाजपने महाराष्ट्रातही जोरदार तयारी सुरू केली आहे. भाजपसोबत राज्याच्या सत्तेत शिवसेनेचा शिंदे गट आणि राष्ट्रवादीचा अजित पवारांचा गट असला तरी भाजपने अनेक ठिकाणी स्वबळावर लढण्याचा निर्धार केल्याचे दिसून येत आहे. किंबहुना राज्यातील सर्वच 48 जागा भाजप लढणार असल्याचेही सांगितले जात आहे. त्यामुळेच प्रत्येक लोकसभा मतदारसंघातील तयारीचा आढावा घेतला जात आहे. त्यासाठीच भाजपाचे प्रदेशाध्यक्ष चंद्रशेखर बावनकुळे जिल्हा दौऱ्यावर येत आहेत.त्यांच्या धाराशिव जिल्हा दौऱ्याची जय्यत तयारी करण्यात आल्याची माहिती पक्षाचे जिल्हाध्यक्ष संताजीराजे चालुक्य यांनी दिली. चार राज्यातील विधानसभा निवडणुकीत भाजपला घवघवीत यश मिळाल्याबद्दल प्रदेशाध्यक्ष श्री बावनकुळे यांचा जंगी सत्कार करण्यात येणार असल्याचेही श्री चालुक्य यांनी सांगितले.
भाजपा जिल्हाध्यक्ष श्री चालुक्य म्हणाले, प्रदेशाध्यक्ष श्री बावनकुळे धाराशिव लोकसभा मतदार संघ व सहा विधानसभा मतदारसंघातील पक्ष संघटन अधिक बळकट करण्याच्या मोहिमेच्या अनुषंगाने येत आहेत. लोकसभा कोअर कमिटी बैठकीस बावनकुळे मार्गदर्शन करणार आहेत. त्यानंतर दुपारी सुपर वॉरिअर्स यांच्याशी बावनकुळे संवाद साधणार आहेत. मंडळ, बूथ प्रमुख नियुक्तीचा आढावा घेणार आहेत. बावनकुळे यांच्या या महत्वपूर्ण दौऱ्याच्या पार्श्वभूमिवर धाराशिव लोकसभा मतदारसंघात तयारी करण्यात आली आहे. लोकसभा मतदारसंघातील धाराशिव, तुळजापूर, परंडा,उमरगा (जिल्हा धाराशिव), औसा ( जिल्हा लातूर)व बार्शी (सोलापूर ) या ६ विधानसभा मतदारसंघ निहाय पक्षाचे पदाधिकारी व वॉरिअर्स यांच्या बैठका घेण्यात आल्या आहेत. या पूर्वतयारी बैठकीस आ. राणाजगजितसिंह पाटील, आ. अभिमन्यू पवार, आ. राजेंद्र राऊत, माजी आ. सुजितसिंह ठाकूर, जिल्हाध्यक्ष संताजीराजे चालुक्य – पाटील आदींनी मार्गदर्शन केले.
यशाबददल बावनकुळे यांचा सत्कार होणार
मध्य प्रदेश, राजस्थान, छत्तीसगड या ३ प्रमुख राज्यातील विधानसभा निवडणुकीत भारतीय जनता पार्टीने घवघवीत यश संपादन केले. भाजपाने ३ प्रमुख राज्यात सत्ता संपादन केल्याबद्दल भाजपाचे प्रदेशाध्यक्ष बावनकुळे यांचा धाराशिव जिल्हा भाजपाच्या वतीने जंगी सत्कार करण्यात येणार आहे, अशी माहिती जिल्हाध्यक्ष श्री चालुक्य पाटील यांनी दिली.
