महाराष्ट्र-कर्नाटक सीमेवर अपघात, दर्शन करून गावी परतताना दुर्घटना
प्रतिनिधी / उमरगा
देवदर्शनासाठी गेलेल्या भाविकांच्या ऑटो रिक्षाला महाराष्ट्र-कर्नाटक सीमेवर अपघात झाला आहे. या अपघातात उमरगा तालुक्यातील तीनजण,तुळजापूर तालुक्यातील एक, असे चारजण जागीच ठार झाले आहेत. हा अपघात सोमवारी दुपारी अडीच वाजेच्या सुमारास मन्नाळी भागात घडला. ऑटो रिक्षाला ट्रकने पाठीमागून जोराची धडक दिल्याने दुर्दैवी घटना घडली आहे. मृतांमध्ये तिघे उमरगा तालुक्यातील सुंदरवाडी (विठ्ठल मंदिर माळ) येथील तर एक महाविद्यालयीन मुलगी शहापूर (ता. तुळजापूर) येथील रहिवाशी आहे.
सुंदरवाडी येथील सुनिल महादेव जगदाळे यांचा ऑटोरिक्षा आहे. श्रावण महिन्यातील सोमवार असल्याने ते स्वतः आई, पत्नी, मुलगी, भाची व अन्य दोघी असे सात जण ऑटोरिक्षाने (एमएच २५ एम १३१९) अमृतकुंड येथे दर्शनासाठी गेले होते. दर्शन घेऊन परत गावाकडे निघाल्यानंतर मन्नाळी बॉन्ड्री येथे ट्रकने ( केए ५६ /०५७५) ऑटोरिक्षाला पाठीमागून जोराची धडक दिली. धडकेनंतर ऑटोरिक्षा दुभाजकावर चढला, त्याचवेळी रस्त्यावर पडलेले तिघेजण ट्रकखाली चिरडले.त्यात प्रमिला सुनिल जगदाळे (३२) यांचा जागीच मृत्यु झाला तर सुनिल जगदाळे, सुनिलची आई अनुसया महादेव जगदाळे ( ७०), व सुनिलची भाची पुजा विजय जाधव (१७,रा. शहापूर,ता. तुळजापूर) यांचा उमरगा येथील उपजिल्हा रुग्णालयात उपचारादरम्यान मृत्यु झाला. गीता शिवराम जगदाळे (४०) या गंभीर जखमी असल्याने त्यांना उपचारासाठी लातूरला हलवण्यात आले आहे. आठ वर्षीय लक्ष्मी सुनिल जगदाळे व दहा वर्षाची आस्मिता शिवराम जगदाळे या जखमी मुलींवर खासगी रुग्णालयात उपचार सुरू आहेत. दरम्यान बस्वकल्याणचे आमदार शरणू सगर यांनी अपघातस्थळी भेट दिली. तर उमरग्याचे आमदार ज्ञानराज चौगुले यांनी उपजिल्हा रुग्णालयात जाऊन जखमी मुलीची विचारपुस केली व नातेवाईकांचे सांत्वन केले.
