प्रतिनिधी / धाराशिव
शेतकरी कामगार पक्षाचे ज्येष्ठ नेते स्व. भाई उद्धवराव पाटील यांचे नातू आणि शेतकरी कामगार पक्षाचे जिल्हा चिटणीस भाई धनंजय पाटील यांचे चिरंजीव आदित्य पाटील यांनी राष्ट्रवादी काँग्रेसमध्ये प्रवेश केला असून, त्यांच्यावर राष्ट्रवादी युवक काँग्रेसच्या प्रदेश सचिवपदाची जबाबदारी देण्यात आली आहे. पक्षाचे अध्यक्ष शरद पवारांच्या उपस्थितीत त्यांना शनिवारी हे नियुक्तीपत्र देण्यात आले.
शेतकरी कामगार पक्षाचे नेते स्व. उद्धवराव पाटील हे तत्वनिष्ठ राजकारणी होते. त्यांनी शेतकरी, कामगार, कष्टकऱ्यांसाठी मोठा लढा उभा केला होता. तात्विक राजकारणामुळे त्यांचा राज्याच्या राजकारणात वेगळा दबदबा होता. त्यांनी कुठल्याही तडजोडीशिवाय संघर्षमय जीवनातून मार्गक्रमण करीत राजकारण केले. आजही त्यांचे नाव आदराने घेतले जाते. त्यांच्या कुटुंबालाही हा राजकीय वारसा आहे. भाई उद्धवराव पाटील यांचे चिरंजीव भाई धनंजय पाटील हे शेकापचे जिल्हा चिटणीस असून, त्यांच्या माध्यमातून पक्षाचे विचार घराघरापर्यंत पोहचवले जात आहेत.
तिसरी पिढी राष्ट्रवादीसोबत
शेतकरी कामगार पक्षाचे नेते भाई धनंजय पाटील यांचे चिरंजीव आदित्य पाटील यांनी राष्ट्रवादीची वाट धरली आहे. पुण्यात शनिवारी झालेल्या राष्ट्रवादी युवक काँग्रेसच्या एका कार्यक्रमात त्यांनी पक्षात प्रवेश केला आणि त्यांच्यावर युवक काँग्रेसच्या प्रदेश सचिवपदाची जबाबदारी सोपविण्यात आली. भाई उद्धवराव पाटील यांची तिसरी पिढी राष्ट्रवादी काँग्रेससोबत गेल्याने राजकीय चर्चा तर होणारच. पक्षाचे अध्यक्ष शरद पवारांच्या उपस्थितीत राष्ट्रवादीचे प्रदेशाध्यक्ष जयंतराव पाटील, युवक काँग्रेसचे प्रदेशध्यक्ष महेबुब शेख यांनी आदित्य पाटील यांना नियुक्तीपत्र दिले. यावेळी राष्ट्रवादी काँग्रेसचे नेते उपस्थित होते.
