आमदार राणाजगजितसिंह पाटील यांनी मागविल्या जनतेच्या प्रतिक्रिया
प्रतिनिधी / तुळजापूर
तीर्थक्षेत्र तुळजापूर (tuljapur) शहराचा विकास घडवून आणत शहराचा कायापालट करण्याच्या दृष्टीने वेगवेगळ्या स्तरावर प्रयत्न सुरू झाले आहेत. तुळजापूर तीर्थक्षेत्र विकास आराखडा तयार करण्यात आला असून, या अंतर्गत मंदिर परिसरात तसेच शहरात विविध विकास कामे करण्यात येणार आहेत. तुळजापूर शहरातील नवीन बसस्थानकाचे स्वरूप कसे असावे, यासंदर्भात आमदार राणा जगजितसिंह पाटील (rana jagjitsingh patil) यांनी नागरिकांच्या प्रतिक्रिया मागवल्या आहेत.
त्यांनी नवीन प्रस्तावित बस स्थानकाचे संकल्पचित्र आपल्या सोशल मीडियाच्या माध्यमातून प्रसिद्ध केले आहे. त्यात त्यांनी म्हटले आहे की, बसस्थानकाचा प्रस्तावित आराखडा तयार केला जात आहे. हे बसस्थानक कसे वाटले, याबद्दल नागरिकांनी आपल्या प्रतिक्रिया कळवाव्यात. भाविक आणि पर्यटकांना आगमनापासून आपल्या धार्मिक – ऐतिहासिक वारसा स्थळाविषयी सकारात्मक भावना निर्माण करणारे हे स्थानक असावे, अशी यामागील संकल्पना आहे.
