आरंभ मराठी / धाराशिव
धाराशिव जिल्ह्यात गेल्या दोन दिवसांपासून राजकीय चर्चांना मोठे उधाण आले असून, खासदार ओमराजे निंबाळकर हे शिंदे गटात प्रवेश करणार असल्याच्या बातम्या वेगाने पसरत आहेत. या चर्चांचे खंडन स्वतः खासदार ओमराजे निंबाळकर तसेच शिवसेनेच्या अनेक पदाधिकाऱ्यांनी स्पष्टपणे केले असले, तरीही सोशल मीडियावर या अफवा थांबण्याचे नाव घेत नाहीत.
यातच आमदार कैलास पाटील यांच्याबाबतही अशाच प्रकारच्या पक्षांतराच्या चर्चांना जोर मिळत असून, दोन्ही नेते शिंदे गटात जाणार असल्याचे संदेश मोठ्या प्रमाणावर व्हायरल होत आहेत. विशेष म्हणजे, आज सकाळपासून एकनाथ शिंदे यांच्यासोबत खासदार ओमराजे निंबाळकर आणि आमदार कैलास पाटील यांचा एक फोटो सोशल मीडियावर मोठ्या प्रमाणावर शेअर केला जात आहे. या फोटोमुळे पुन्हा एकदा या चर्चांना खतपाणी मिळाले आहे. दरम्यान, खासदार आणि आमदार खरोखरच शिंदे गटात प्रवेश करणार का? असा प्रश्न आता सामान्य नागरिकांमध्येही निर्माण झाला आहे.
त्यातच उपमुख्यमंत्री तथा शिवसेनेचे प्रमुख नेते एकनाथ शिंदे यांचा उद्या धाराशिव दौरा असल्याने या चर्चांना आणखी उधाण आले आहे. मात्र, या सर्व गोंधळामागील सत्य हळूहळू समोर येऊ लागले आहे. सोशल मीडियावर व्हायरल झालेला फोटो हा खरा नसून ‘मॉर्फ’ केलेला असल्याचे स्पष्ट झाले आहे.
संबंधित फोटो हा कोरोना काळातील असून, त्या वेळी शिवसेना एकसंध असताना धाराशिव शहरात एका स्थानिक नेत्याच्या पक्षप्रवेशावेळी घेतलेला आहे. मूळ फोटोत असलेल्या त्या नेत्याचा भाग काढून टाकून, केवळ एकनाथ शिंदे यांच्यासोबत ओमराजे निंबाळकर आणि कैलास पाटील यांना दाखवण्याचा प्रयत्न करण्यात आल्याचे दिसून येत आहे.
या प्रकारावर शिवसेनेच्या काही पदाधिकाऱ्यांनी तीव्र नाराजी व्यक्त केली असून, हा खोडसाळपणा असल्याचा आरोप त्यांनी केला आहे. जाणूनबुजून लोकांमध्ये संभ्रम निर्माण करण्यासाठी आणि राजकीय वातावरण ढवळून काढण्यासाठी हा प्रकार करण्यात आला आहे, असेही त्यांनी म्हटले आहे.
