आरंभ मराठी / धाराशिव
धाराशिव शहरातील डॉ. बापूजी साळुंखे विधी महाविद्यालयात कायद्याचे शिक्षण घेणाऱ्या एका 34 वर्षीय महिला विद्यार्थिनीचा पाठलाग करून अश्लील शेरेबाजी करणे, मानसिक त्रास देणे तसेच तिच्या पतीला धक्काबुक्की केल्याच्या प्रकारातून त्याच महाविद्यालयातील दोन विद्यार्थ्यांवर गुन्हा दाखल करण्यात आला आहे.
प्रबुद्ध गायकवाड व सुरज काशीद अशी दोन आरोपींची नावे आहेत. या दोन विद्यार्थ्यांविरुद्ध आनंदनगर पोलिस ठाण्यात मारहाण व विनयभंगाचा गुन्हा दाखल करण्यात आला आहे.
धाराशिव शहरातील रहिवासी असलेली 34 वर्षीय महिला डॉ. बापूजी साळुंखे विधी महाविद्यालयात कायद्याचे शिक्षण घेत आहे. 30 सप्टेंबर रोजी सकाळी साडेदहा वाजण्याच्या सुमारास ती महाविद्यालयात गेली असताना, तेथीलच दोन विद्यार्थ्यांनी तिला विनाकारण त्रास देण्यास सुरुवात केल्याचे तिने पोलिसांकडे दिलेल्या तक्रारीत म्हटले आहे.
महिला विरोध करत नसल्याचे पाहून संबंधित विद्यार्थ्यांनी तिचा सातत्याने पाठलाग केल्याचा आरोप आहे.
“तुम्ही मला बोलत का नाही?” असे म्हणत आरोपींनी अश्लील भाषेत अपशब्द वापरले. तसेच, “तुम्ही नाही बोललात तरी आम्ही बोलणारच. जोपर्यंत तुम्ही इतर मुलींप्रमाणे आमच्याशी मोकळेपणाने बोलणार नाही तोपर्यंत आम्ही बोलणार,” असे त्या मुलांनी म्हटल्याचे फिर्यादीत नमूद करण्यात आले आहे.
त्यानंतर आरोपींनी फिर्यादीच्या पतीलाही धक्काबुक्की केल्याचा आरोप आहे. या प्रकरणी आनंदनगर पोलिस ठाण्यात भारतीय न्याय संहिता (BNS) कलम 68, 115(2), 351(2) व 351(3) अन्वये गुन्हा दाखल करण्यात आला असून, पोलिस पुढील तपास करीत आहेत.
दरम्यान, बुधवारी सकाळी साडेअकराच्या सुमारास विधी महाविद्यालयाच्या परिसरात बाहेरील व्यक्तींनी एका विद्यार्थ्याला मारहाण केल्याची घटना घडली होती. या घटनेच्या निषेधार्थ डॉ. बापूजी साळुंखे विधी महाविद्यालयातील विद्यार्थ्यांनी गुरुवारी सुमारे चार तास आंदोलन करून संबंधित व्यक्तींविरुद्ध गुन्हा दाखल करण्याची मागणी केली होती. मात्र, त्यानंतर संबंधित महिला विद्यार्थिनीने समाजमाध्यमावर व्हिडिओ प्रसारित करून या प्रकरणात आपला काही दोष नसल्याचे सांगितले होते. उलट आपल्यासोबतच छेडछाडीचे प्रकार घडल्याचा आरोप तिने केला होता. त्यानंतर महिलेने आनंदनगर पोलिस ठाण्यात जाऊन तक्रार दाखल केली.
या तक्रारीवरून दोघांविरुद्ध गुन्हा नोंद करण्यात आला आहे.
