आरंभ मराठी / तुळजापूर
तुळजापूर शहरात निवडणूक निकाल जाहीर होण्यापूर्वीच राजकीय वातावरण तापले असून मंगळवारी दुपारी दोन गटांत जोरदार राडा झाला. भाजप आणि काँग्रेस समर्थकांमध्ये झालेल्या या वादाचे रूपांतर हाणामारीत झाले. या घटनेत कुलदीप मगर हा युवक गंभीर जखमी झाला असून तो महाविकास आघाडीचे नगराध्यक्षपदाचे उमेदवार अमर मगर यांचा पुतण्या आहे.
मंगळवारी (दि. १६) दुपारच्या सुमारास शहरातील नळदुर्ग रोड परिसरात भाजप व काँग्रेसच्या दोन गटांमध्ये आधी शाब्दिक वाद झाला. वाद वाढत गेल्यानंतर दोन्ही बाजूंनी एकमेकांवर हात उगारले गेले. अचानक उसळलेल्या हाणामारीमुळे परिसरात एकच गोंधळ उडाला. या घटनेची माहिती मिळताच मोठ्या प्रमाणात नागरिक घटनास्थळी जमा झाले.
परिस्थिती हाताबाहेर जाऊ नये म्हणून पोलिसांनी हस्तक्षेप केला. या राड्यामुळे नळदुर्ग रोडवरील वाहतूक सुमारे दोन तास पूर्णपणे ठप्प झाली होती. बाजारपेठेतील वातावरण तणावपूर्ण बनल्याने सुरक्षिततेच्या कारणास्तव अनेक व्यापाऱ्यांनी आपली दुकाने बंद ठेवली. अचानक घडलेल्या या घटनेमुळे शहरातील दैनंदिन व्यवहारावर परिणाम झाला.
जखमी कुलदीप मगर यांना तातडीने उपचारासाठी रुग्णालयात दाखल करण्यात आले आहे. घटनेनंतर पोलिसांनी परिसरात बंदोबस्त वाढवला असून परिस्थिती नियंत्रणात आणण्याचे प्रयत्न सुरू आहेत. संबंधित प्रकरणी चौकशी सुरू असून दोषींवर कायदेशीर कारवाई केली जाईल, असे पोलिसांकडून सांगण्यात आले. निवडणूक निकालाआधीच घडलेल्या या घटनेमुळे तुळजापूर शहरात कायदा व सुव्यवस्था राखणे हे प्रशासनासमोर मोठे आव्हान ठरणार आहे.
