आरंभ मराठीच्या बातमीची पालकमंत्र्यांनी घेतली दखल
आरंभ मराठी / धाराशिव
दीड महिन्यांपूर्वी उद्घाटन झालेल्या तुळजापूर आणि धाराशिव बस स्थानकाच्या निकृष्ट कामाबद्दल दैनिक आरंभ मराठीने वारंवार आवाज उठवून या बस स्थानकाच्या निकृष्ट कामाची चौकशी करण्याची मागणी केली होती.
या मागणीची दखल घेऊन परिवहन मंत्री आणि धारशिवचे पालकमंत्री प्रताप सरनाईक यांनी धाराशिव आणि तुळजापूर येथील बस स्थानकाच्या बांधकामा संबंधी जबाबदार असलेल्या अधिकाऱ्यांची तात्काळ चौकशी करण्याचे आदेश दिले आहेत.
खरीप हंगामाच्या आढावा बैठकीसाठी पालकमंत्री सरनाईक गुरुवारी (दि.१२) धाराशिव दौऱ्यावर आले होते. यावेळी बस स्थानकाच्या प्रश्नावर त्यांनी चौकशीचे आदेश दिल्याचे सांगितले. पालकमंत्री यांनी दिनांक 30 एप्रिल रोजी तुळजापूर येथील तर 1 मी रोजी धाराशिव येथील बस स्थानकाचे उद्घाटन केले होते.
परंतु, बस स्थानकाचे संपूर्ण काम न करता त्याचे उद्घाटन केल्यामुळे प्रवाशांचे हाल होत आहेत. बस स्थानकाचे पूर्ण काम न करता चुकीची माहिती देऊन त्याचे उद्घाटन करण्यात आल्याचे पालकमंत्री सरनाईक म्हणाले.
सध्या प्रवाशांचे हाल होत असल्यामुळे त्यांनी पालकमंत्री म्हणून दिलगिरी व्यक्त केली. या प्रकरणी जबाबदार अधिकाऱ्यांची तात्काळ चौकशी करावी आणि अहवाल सादर करावा असे आदेश त्यांनी आज दिले. यातील दोषींवर कडक कारवाई करण्याचा इशारा त्यांनी दिला.
आरंभ मराठीने तुळजापूर आणि धाराशिव या दोन्ही बस स्थानकाच्या निकृष्ट कामावर बोट ठेऊन बातम्या प्रकाशित केल्या होत्या. त्याचीच दखल घेऊन आज पालकमंत्री यांनी चौकशीचे आदेश दिले आहेत.
