आरंभ मराठी / धाराशिव
नगरपालिका निवडणुकीचे मतदान आज राज्यातील विविध ठिकाणी पार पडत असतानाच उमेदवार आणि राजकीय पक्षांना धक्का देणारी महत्त्वाची बातमी समोर आली आहे. पूर्वनियोजित कार्यक्रमानुसार 3 डिसेंबर रोजी मतमोजणी होणार अशी अपेक्षा होती. मात्र, निवडणूक आयोगाने काही नगरपालिका आणि नगरपंचायतींच्या निवडणुका रद्द करून नवीन सुधारित कार्यक्रम जाहीर केल्याने परिस्थिती ढवळून निघाली.
धाराशिव नगरपालिकेतील तीन तसेच उमरगा नगरपालिकेतील तीन जागांच्या निवडणुकीवर न्यायालयीन अपील दाखल झाल्यानंतर राज्य निवडणूक आयोगाने शनिवारी रात्री उशिरा सुधारित कार्यक्रम प्रसिद्ध केला. या कार्यक्रमानुसार राज्यातील तब्बल 25 नगरपालिका आणि नगरपंचायतींमध्ये सुधारित वेळापत्रक लागू करण्यात आले आहे.
मात्र, आयोगाच्या सुधारित आदेशामध्ये 2 डिसेंबरला होणाऱ्या मतदानाची मतमोजणी 3 डिसेंबरलाच घ्यायची की पुढे ढकलायची याबाबत स्पष्ट निर्देश नसल्याने प्रशासनासह उमेदवारांमध्ये संभ्रम निर्माण झाला होता.
या संदर्भातील सुनावणी आज उच्च न्यायालयात झाली आणि महत्वाचा निर्णय देत न्यायालयाने स्पष्ट केले की—
आज (2 डिसेंबर) मतदान पार पडणाऱ्या तसेच 20 डिसेंबरला होणाऱ्या मतदानाच्या सर्व जागांची मतमोजणी ही एकत्रितपणे 21 डिसेंबर 2025 रोजी घेण्यात येईल.
या निर्णयामुळे सर्वच राजकीय पक्ष, उमेदवार आणि कार्यकर्त्यांमध्ये आश्चर्य व नाराजीचे वातावरण निर्माण झाले आहे. मतमोजणीत होणारा विलंब आणि त्यापूर्वी जवळपास तीन आठवड्यांचा कालावधी उमेदवारांच्या मानसिक ताणात भर घालणारा ठरणार आहे.
या निर्णयामुळे आता राज्यातील नगरपालिका निवडणुकीचा राजकीय ताप पुन्हा एकदा वाढणार असून 21 डिसेंबर हा निकालाचा दिवस ठरणार आहे.
