नसरोद्दीन फकीर / आरंभ मराठी
उमरगा –
नऊ वर्षांनंतर झालेल्या उमरगा पंचायत समितीच्या पंचवार्षिक निवडणुकीने तालुक्याच्या राजकारणात मोठी खळबळ उडवून दिली आहे. शिवसेना (शिंदे), भारतीय जनता पार्टी आणि राष्ट्रवादी काँग्रेस (अजित पवार) या महायुतीने जोरदार मुसंडी मारत १८ पैकी तब्बल १३ जागांवर विजय मिळवला असून पंचायत समितीवर महायुतीचे स्पष्ट वर्चस्व प्रस्थापित झाले आहे.
यंदा उमरगा पंचायत समितीतील गणांचे आरक्षण अनुसूचित जाती प्रवर्गासाठी राखीव असून, त्यामध्ये भुसणी, केसरजवळगा आणि कवठा या गणांचा समावेश आहे. या पार्श्वभूमीवर सभापतीपदाची निवड अधिकच महत्त्वाची ठरली असून, राजकीय हालचालींना वेग आला आहे.
पक्षीय बलाबल काय सांगते?
निवडणूक निकालानुसार
भाजप – ७ जागा
शिवसेना (शिंदे) – ५ जागा
कॉंग्रेस – ३ जागा
राष्ट्रवादी काँग्रेस (अजित पवार) – १ जागा
शिवसेना (उबाठा) – १ जागा
अपक्ष – १ जागा
असे एकूण १८ सदस्य निवडून आले आहेत. संख्याबळ पाहता महायुतीकडे सभापतीपदाची चावी असून, पहिल्या अडीच वर्षांसाठी भाजपचे कैलास चिंतामणराव शिंदे यांचे नाव आघाडीवर असल्याची चर्चा आहे. मात्र, राजकीय वर्तुळात आणखी एक नाव ठळकपणे पुढे येत आहे—केसरजवळगा गणातून विजयी झालेल्या कु. आकांक्षा ज्ञानराज चौगुले. त्या शिवसेना (शिंदे) पक्षाचे उपनेते व माजी आमदार ज्ञानराज चौगुले यांच्या कन्या असून, नव्या नेतृत्वाचे प्रतीक म्हणून त्यांच्याकडे पाहिले जात आहे.
महायुतीतील अंतर्गत वाटाघाटींमध्ये शिवसेनेला संधी देण्याचा निर्णय झाला, तर सभापतीपदासाठी आकांक्षा चौगुले यांची वर्णी लागण्याची दाट शक्यता वर्तवली जात आहे. त्यामुळे उमरगा तालुक्यातील राजकारणात उत्सुकता शिगेला पोहोचली आहे.
उमरगा पंचायत समितीच्या १८ गणांतून विजयी झालेले उमेदवार असेआहेत –
कवठा : सौ. रुक्मिणी देविदास कांबळे (कॉंग्रेस)
नाईचाकूर : सुगलाबाई वामन मदणे (कॉंग्रेस)
बलसुर : अर्चना साहेबराव पाटील (राष्ट्रवादी काँग्रेस अप)
माडज : स्वाती मन्मथ सोमशंकर (शिवसेना शिंदे)
कुन्हाळी : रविंद्र शंकर हंगरगे (कॉंग्रेस)
तलमोड : दगडू कालीदास मोरे (भाजप)
तुरोरी : तुकाराम मदनराव जाधव (शिवसेना)
मुळज : रेखा विक्रम इंगळे (अपक्ष)
गुंजोटी : सौ. स्नेहा संतोष जाधव (शिवसेना)
जकेकुर : हरिदास भानुदास जाधव (शिवसेना उबाठा)
दाळींब : अमर विद्याधर वाले (भाजप)
भुसणी : कैलास चिंतामणराव शिंदे (भाजप)
येणेगुर : सौ. विजयालक्ष्मी श्रीकांत पाटील (भाजप)
तुगाव : सौ. रेखा संजय मुळे (भाजप)
आलूर : राजकुमार शंकरराव माने (भाजप)
केसरजवळगा : कु. आकांक्षा ज्ञानराज चौगुले (शिवसेना)
कदेर : सौ. महानंदा हणमंत कलबुर्गे (शिवसेना)
डिग्गी : अनिल दत्तोपंत माने (भाजप)
कोण होणार उमरग्याचा सभापती?
एकीकडे भाजपचे संख्याबळ, तर दुसरीकडे शिवसेनेची राजकीय वजनदार दावेदारी या संघर्षातून उमरगा पंचायत समितीचा सभापती कोण होणार? याकडे सर्वांचे लक्ष लागले आहे. पुढील काही दिवसांत होणाऱ्या वाटाघाटी आणि निर्णयावर तालुक्याच्या राजकारणाची दिशा ठरणार आहे. शिवसेना उपनेते ज्ञानराज चौगुले यांनी लेकीसाठी संपूर्ण ताकद लावली असून, महायुतीच्या वाटाघाटी मध्ये त्याला कितपत यश मिळणार याकडे संपूर्ण तालुक्याचे लक्ष लागले आहे.
