प्रतिनिधी / कळंब
सामाजिक क्षेत्रात अग्रेसर असलेल्या रोटरी क्लब ऑफ कळंब सिटी व इनरव्हील क्लबचा 2023-24 या वर्षासाठीचा पदग्रहण सोहळा रविवारी (दि.9) साई मंगल कार्यालयात पार पडला.
रोटरी क्लब कळंबचे नूतन अध्यक्ष म्हणून सुदर्शन नारकर तर नूतन सचिव म्हणून प्रा. डॉ.साजेद चाऊस यांनी पदभार स्वीकारला. त्यांच्यासोबतच इनरव्हील क्लबच्या नूतन अध्यक्षा म्हणून डॉ.आकांक्षा पाटील व सचिव म्हणून डॉ.जेमिनी भिंगारे यांनीही पदभार स्वीकारला.
यावेळी मावळत्या अध्यक्षांनी वर्षभरात केलेल्या कार्यक्रमाचा आढावा घेतला तसेच नूतन अध्यक्ष व सचिव यांनी वर्षभरात कोणकोणते उपक्रम राबविणार याची माहिती दिली. यावेळी सर्व नूतन पदाधिकाऱ्यांचाही सत्कार करण्यात आला. या कार्यक्रमामध्ये रोटरी परिवाराच्या वतीने दिला जाणारा 2023 चा कळंब भूषण पुरस्कार ज्ञान प्रसारक मंडळाचे सचिव, माजी प्राचार्य डॉ. अशोकराव मोहेकर यांना मान्यवरांच्या हस्ते प्रदान करण्यात आला. कळंब तालुक्यामधून दहावी व बारावीमध्ये प्रथम आलेल्या विद्यार्थ्यांचा सत्कारही यावेळी करण्यात आला. कार्यक्रमासाठी प्रमुख पाहुणे म्हणून ज्येष्ठ पत्रकार अरविंद जोशी आणि रोटरीचे उपप्रांतपाल विनय जाजू यांची उपस्थिती लाभली. कार्यक्रमासाठी शहरातील विविध क्षेत्रातील मंडळींचे मोठी उपस्थिती होती.
