आरंभ मराठी / तेर
धाराशिव तालुक्यातील बुकनवाडी येथे मोटारसायकल चोरीच्या प्रकरणावरून शुक्रवारी (दि. ११) सायंकाळी झालेल्या तुफान हाणामारीत महेश सुरेश चामे याचा उपचारादरम्यान मृत्यू झाला. तसेच या घटनेत पाच जण गंभीर जखमी झाले. या प्रकरणी बुकनवाडी येथील पारधी पेढीतील २१ जणांविरुद्ध ढोकी पोलीस ठाण्यात विविध कलमान्वये गुन्हा दाखल करण्यात आला आहे. घटनेनंतर परिसरात तणावाचे वातावरण निर्माण झाले होते. मोटारसायकल चोरीच्या प्रकरणावरून शुक्रवारी सायंकाळी बुकनवाडी येथे दोन गटांत वाद होऊन त्याचे रूपांतर तुफान हाणामारीत झाले. यामध्ये महेश सुरेश चामे हा गंभीर जखमी झाला. त्याच्यावर सोलापूर येथे उपचार सुरू असताना त्याचा मृत्यू झाला. याशिवाय मारुती परगे, काका परगे, करण आवले, सतीश आवले व नाना आवले यांना जिवे मारण्याच्या उद्देशाने तीक्ष्ण हत्याराने मारहाण करून गंभीर जखमी केल्याचे फिर्यादीत नमूद आहे. या घटनेची माहिती मिळताच ढोकीचे सहाय्यक पोलीस निरीक्षक विलास हजारे व पोलीस उपनिरीक्षक किशोर माळी यांनी घटनास्थळी भेट देऊन परिस्थितीची पाहणी केली.
मयत महेश चामे याचे वडील सुरेश चामे यांनी दिलेल्या फिर्यादीवरून बुकनवाडी येथील पारधी पेढीतील बन्सी काळे, पिंटू काळे, देवराव काळे व कोंबड्या काळे यांनी महेश चामे याच्या पोटात धारदार हत्यार खुपसून त्याचा जीव घेतल्याचा आरोप करण्यात आला आहे. तसेच दत्ता काळे, बेगा काळे, शोभा काळे, यमुना काळे, कैलास काळे, पोपट शिंदे, कारकून शिंदे, महादेव शिंदे, मोतीराम काळे, तानाजी काळे, बादल काळे, मुकरा काळे, सचिन शिंदे, वैशाली शिंदे, गितू काळे, विशाल काळे व पापा शिंदे अशा एकूण २१ जणांविरुद्ध ढोकी पोलीस ठाण्यात गुन्हा दाखल करण्यात आला आहे.
या प्रकरणाचा पुढील तपास सहाय्यक पोलीस निरीक्षक विलास हजारे करीत आहेत. दरम्यान, शनिवारी (दि.१२) मयत महेश चामे यांच्यावर बुकनवाडी येथे शोकाकुल वातावरणात अंत्यसंस्कार करण्यात आले.
