आरंभ मराठी / ढोकी
दोन तासांपूर्वी ढोकी येथील दत्तनगर-राजेशनगर परिसरात दोन गटांत झालेल्या वादाचे पर्यवसान जोरदार हाणामारी आणि दगडफेकीत झाले. दोन्ही बाजूंनी झालेल्या दगडफेकीमुळे लातूर-बार्शी मुख्य रस्त्यावर दगडांचा खच पडला. काही वाहनांचे व दुकानांचे नुकसान झाले. या घटनेत पाच जण जखमी झाले असून त्यांना उपचारासाठी धाराशिव येथील जिल्हा शासकीय रुग्णालयात हलविण्यात आले.
रविवारी रात्री आठच्या सुमारास दत्तनगर आणि राजेशनगर परिसरात पारधी समाजातील दोन गटांमध्ये काही कारणावरून वाद सुरू झाला. सुरुवातीच्या बाचाबाचीचे रूपांतर हाणामारीत झाले. त्यानंतर दोन्ही गटांकडून एकमेकांवर दगडफेक सुरू झाली. अचानक झालेल्या दगडफेकीमुळे परिसरात मोठी धावपळ उडाली.
दगडफेकीचा परिणाम लातूर-बार्शी मुख्य रस्त्यावरही झाला. रस्त्यावर दगडांचा खच पडल्याने वाहतुकीवर परिणाम झाला. काही वाहनांचे नुकसान झाले, तर घाबरलेल्या व्यापाऱ्यांनी दुकाने बंद केली.
घटनेची माहिती मिळताच ढोकी पोलिसांनी घटनास्थळी धाव घेत परिस्थिती नियंत्रणात आणण्याचा प्रयत्न केला. सहाय्यक पोलीस निरीक्षक विलास हजारे यांच्या मार्गदर्शनाखाली पोलिस बंदोबस्त वाढविण्यात आला. परिस्थिती अधिक चिघळू नये म्हणून राज्य राखीव दलाची एक तुकडीही ढोकीत दाखल झाली. धाराशिव बाजार समितीचे संचालक निहाल काझी यांनी घटनास्थळी जाऊन वाद शांत करण्याचा प्रयत्न केला.
पाच जण जखमी
या हाणामारीत बाबासाहेब चव्हाण, तोळाबाई चव्हाण, राजेंद्र चव्हाण, आनंदा पवार आणि आप्पा पवार हे पाच जण जखमी झाले. त्यांच्यावर ढोकी प्राथमिक आरोग्य केंद्रात प्रथमोपचार करून पुढील उपचारासाठी धाराशिव जिल्हा शासकीय रुग्णालयात हलविण्यात आले.
५० ते ६० युवक पोलिस ठाण्यात
घटनेनंतर दत्तनगर-राजेशनगर परिसरातील सुमारे ५० ते ६० युवक पोलिस ठाण्यात दाखल झाले. भविष्यात पुन्हा अनुचित प्रकार घडू नये, यासाठी परिसरात पोलिस बंदोबस्त वाढविण्याची मागणी करण्यात आली. दरम्यान, रात्री उशिरापर्यंत गुन्हा दाखल करण्याची प्रक्रिया सुरू होती.
वादाचे नेमके कारण अस्पष्ट
घटनेमागे जुना वाद असल्याची प्राथमिक माहिती समोर येत आहे. त्याच दिवशी बार्शी तालुक्यातील बोरमाळा येथे पारधी समाजाचा धार्मिक कार्यक्रम झाल्याचीही माहिती आहे. मात्र, ढोकीतील वाद नेमका कशामुळे सुरू झाला आणि त्याला हिंसक वळण कसे मिळाले, याचा तपास पोलिसांकडून सुरू आहे. सध्या परिस्थिती नियंत्रणात असली तरी परिसरात तणावाचे वातावरण आहे.
