आरंभ मराठी/
येणेगूर : उमरगा तालुक्यातील येणेगूर येथे श्री सद्गुरू बाळूमामा बगा नंबर १० च्या पालखीचे आगमन होताच संपूर्ण परिसर भक्तिमय वातावरणात न्हाऊन निघाला आहे. या पालखी सोहळ्यात १५० मेंढपाळांसह ३००० मेंढ्या दाखल झाल्या असून, दर्शनासाठी आणि कीर्तन सेवेसाठी परिसरातील भाविकांची अलोट गर्दी पाहायला मिळत आहे.
बुधवारी पालखीचे येणेगूर नगरीत आगमन झाले. त्यानंतर पुढील सात दिवस सुधाकर गायकवाड यांच्या शेतात पालखीचा मुक्काम निश्चित करण्यात आला. यादरम्यान, परिसरातील भाविकांनी सकाळ-संध्याकाळ आरतीसाठी मोठी गर्दी केली होती. भक्ती आणि प्रबोधनाचा संगम
या सोहळ्याच्या निमित्ताने दररोज कीर्तन सेवेचे आयोजन करण्यात आले होते. यात ह.भ.प. गणेश महाराज शेलार, ह.भ.प. हनुमंत महाराज भिसे आणि ह.भ.प. अजय महाराज तरडे या युवा कीर्तनकारांनी आपल्या वाणीतून बाळूमामांच्या चरित्रावर प्रकाश टाकला. मुक्या प्राण्यांची करील सेवा, त्याला बाळू मामा देतील मेवा,हा संदेश देऊन महाराजांनी भाविकांना सेवा आणि समर्पणाचे महत्त्व पटवून दिले. पालखी सोहळ्यासोबतच सामाजिक उपक्रमही राबवण्यात आले. यामध्ये १७० भाविकांनी रक्तदान करून सामाजिक बांधिलकी जपली. तसेच, येणेगूर प्राथमिक आरोग्य केंद्राच्या वतीने भाविकांसाठी मोफत आरोग्य तपासणी व औषधोपचाराची सोय करण्यात आली होती. ग्रामस्थांच्या वतीने ठिकठिकाणी भाविकांसाठी अन्नदानाची व्यवस्था करण्यात आली होती. बुधवारी भव्य मिरवणूक पालखी सोहळ्याच्या समारोपानिमित्त येत्या बुधवारी (ता. १५) येणेगूर गावातून श्री सद्गुरू बाळूमामांची भव्य मिरवणूक काढण्यात येणार आहे. या सोहळ्यात परिसरातील सर्व भाविक-भक्तांनी मोठ्या संख्येने सहभागी व्हावे, असे आवाहन जय मल्हार कमिटीकडून करण्यात आले आहे. कायदा व सुव्यवस्था राखण्यासाठी चोख पोलीस बंदोबस्त तैनात करण्यात आला असून, येणेगूर परिसर सध्या बाळूमामांच्या चांगभलं च्या जयघोषाने दुमदुमून गेला आहे.
