आरंभ मराठी / धाराशिव
जिल्हा परिषदेच्या अध्यक्ष व उपाध्यक्ष पदांच्या निवडीनंतर आज (दि.२७) झालेल्या विशेष सभेत चार सभापतींची निवड करण्यात आली असून, महायुतीत समतोल राखत घटक पक्षांना प्रतिनिधित्व देण्यात आले आहे. गेल्या काही दिवसांपासून रंगलेल्या जोरदार रस्सीखेचानंतर अखेर पदवाटप निश्चित झाले असून, कोणत्या पक्षाला किती वाटा मिळणार याबाबतची उत्सुकता संपुष्टात आली आहे.
समाजकल्याण सभापतीपदी विश्वास कोकणे (भाजप), कृषी व पशुसंवर्धन सभापतीपदी भाऊसाहेब खरसडे (राष्ट्रवादी), महिला व बालकल्याण सभापतीपदी पूजा शिंदे (शिवसेना) तर अर्थ व बांधकाम सभापतीपदी सिद्धेश्वर कोरे (भाजप) यांची निवड करण्यात आली. या निवडीमुळे महायुतीतील प्रमुख घटक पक्षांमध्ये संतुलन साधण्याचा प्रयत्न दिसून आला.
जिल्हा परिषद निवडणुकीत भाजप-शिवसेना महायुतीला स्पष्ट बहुमत मिळाल्यानंतर अध्यक्षपदी अर्चनाताई पाटील आणि उपाध्यक्षपदी उषाताई गायकवाड यांची यापूर्वीच निवड झाली होती. त्यानंतर सभापती पदांसाठी विविध इच्छुकांकडून जोरदार प्रयत्न सुरू होते. अखेर आजच्या विशेष सभेत सर्व चर्चांना पूर्णविराम देत चारही सभापतींची अधिकृत घोषणा करण्यात आली.
महाविकास आघाडीकडूनही सभापती पदासाठी उमेदवारी अर्ज दाखल करण्यात आले होते. मात्र सभेत झालेल्या मतदान प्रक्रियेत महायुतीच्या उमेदवारांचा ४५ – १० च्या फरकाने विजय झाला. या पदवाटपामुळे जिल्हा परिषदेतील सत्तासमीकरण आता पूर्णपणे स्पष्ट झाले असून, आगामी काळात विकासकामांना गती मिळण्याची अपेक्षा व्यक्त केली जात आहे.
