आरंभ मराठी / धाराशिव
धाराशिव जिल्ह्यात अवैध शस्त्र बाळगणाऱ्यांविरोधात स्थानिक गुन्हे शाखेने धडक कारवाई करत एका युवकाकडून गावठी कट्टा व जिवंत काडतूस जप्त केले. या कारवाईत एकूण २ लाख ६० हजार ५०० रुपयांचा मुद्देमाल जप्त करण्यात आला असून आरोपीविरुद्ध शस्त्र अधिनियमांतर्गत गुन्हा दाखल करण्यात आला आहे. पोलीस अधीक्षक रितु खोखर यांनी जिल्ह्यातील अवैध धंदे व अवैध शस्त्र बाळगणाऱ्यांविरोधात कडक कारवाई करण्याचे आदेश स्थानिक गुन्हे शाखेला दिले होते. त्या अनुषंगाने स्थानिक गुन्हे शाखेचे सहाय्यक पोलीस निरीक्षक अमोल मोरे, पोलीस उपनिरीक्षक सचिन खटके व त्यांचे पथक तुळजापूर परिसरात गस्त घालत होते.
दरम्यान, पथकाला गोपनीय बातमीदारामार्फत माहिती मिळाली की विनोद उर्फ लाल्या बंडू हुच्चे-गवळी (वय २१ वर्षे, रा. आर्या चौक, तुळजापूर) हा युवक गावठी कट्टा बाळगून हडको मैदान परिसरात बुलेट मोटरसायकलसह थांबलेला आहे. मिळालेल्या खात्रीलायक माहितीच्या आधारे पथकाने दि. २७ फेब्रुवारी २०२६ रोजी रात्री ९.५० वाजता हडको मैदान येथे सापळा रचून संशयिताला ताब्यात घेतले.
पंचासमक्ष त्याची अंगझडती घेतली असता आरोपीच्या कंबरेला खवलेला एक गावठी कट्टा व त्याच्या चेंबरमध्ये एक जिवंत काडतूस आढळून आले. पोलिसांनी पंचनामा करून सुमारे २५ हजार ५०० रुपये किंमतीचा गावठी कट्टा तसेच रॉयल एनफिल्ड कंपनीची बुलेट मोटरसायकल (क्र. एमएच २५ बीडी ०४०७) असा एकूण २ लाख ६० हजार ५०० रुपयांचा मुद्देमाल जप्त केला. या प्रकरणी पोलीस ठाणे तुळजापूर येथे भारतीय शस्त्र अधिनियम १९५९ चे कलम ३ व २५ अन्वये सरकारतर्फे फिर्याद दाखल करण्यात आली असून आरोपीविरुद्ध गुन्हा नोंदविण्यात आला आहे.
पुढील तपास सुरू असून जप्त करण्यात आलेला गावठी कट्टा पुढील कायदेशीर कारवाईसाठी तुळजापूर पोलीस ठाण्याच्या ताब्यात देण्यात आला आहे. ही कारवाई पोलीस अधीक्षक रितु खोखर, अपर पोलीस अधीक्षक शफकत आमना यांच्या मार्गदर्शनाखाली पोलीस निरीक्षक विनोद इज्जपवार, सहाय्यक पोलीस निरीक्षक अमोल मोरे, पोलीस उपनिरीक्षक सचिन खटके तसेच पोलीस कर्मचारी निंबाळकर, जाधवर, चव्हाण, शिंदे, राठोड, अरब, दहीहंडे आदींच्या पथकाने यशस्वीरित्या पार पाडली.
