आरंभ मराठी / धाराशिव
धाराशिव जिल्ह्याचे लक्ष लागून राहिलेल्या तेर जिल्हा परिषद गटाचा निकाल अखेर जाहीर झाला असून भाजपाच्या अर्चनाताई पाटील यांनी दणदणीत विजय मिळवला आहे. तेर येथे झालेली ही निवडणूक तिरंगी व अत्यंत हाय व्होल्टेज ठरली. शेवटच्या फेरीपर्यंत उत्कंठा कायम असलेल्या या लढतीकडे संपूर्ण जिल्ह्याचे लक्ष लागले होते.
या निवडणुकीत भाजपाच्या अर्चनाताई पाटील यांच्यासमोर शिवसेना (उबाठा) पक्षाच्या कीर्तीमाला खटावकर आणि राष्ट्रवादी काँग्रेस (शरद पवार गट) पक्षाच्या सक्षणा सलगर यांचे जोरदार आव्हान होते. मात्र मतमोजणीअंती अर्चनाताई पाटील यांनी प्रतिस्पर्ध्यांना स्पष्ट फरकाने मागे टाकत विजयावर शिक्कामोर्तब केले.
अर्चनाताई पाटील यांना ७,५९७ मते मिळाली, तर शिवसेना (उबाठा) च्या कीर्तीमाला खटावकर यांना ५,२३७ मते मिळाली. राष्ट्रवादी काँग्रेस (शरद पवार गट) च्या सक्षणा सलगर यांना केवळ १,२५३ मते मिळाली. नोटा ला ८२ मते पडली.
एकूण १४,३५० मतदान झालेल्या या गटात अर्चनाताई पाटील यांनी ५० टक्क्यांहून अधिक मते मिळवत तब्बल २,३६० मतांच्या फरकाने दणदणीत विजय संपादन केला. विशेष म्हणजे, हाय व्होल्टेज मानल्या गेलेल्या या लढतीत अर्चनाताई पाटील यांच्या विजयानंतर तेर परिसरात भाजप कार्यकर्त्यांनी जल्लोष केला.
अर्चनाताई पाटील यांना जिल्हा परिषदेच्या भावी अध्यक्षा म्हणून पाहिले जात आहे.
