प्रतिनिधी/ धाराशिव
जिल्ह्यातील जवळपास सर्वच महसूल मंडळात अत्यल्प प्रमाणात पाऊस पडला असताना शासनाने जिल्ह्यातील ११ मंडळाना दुष्काळ सदृश्य स्थितीतून वगळण्यात आले असून, या मंडळांतील देखील NDRF व SDRF च्या निकषाप्रमाणे शेतकऱ्यांना मदत मिळावी, यासाठी या मंडळांचा दुष्काळ सदृश्य स्थितीमध्ये समावेश करावा अशी मागणी आमदार कैलास पाटील यांनी मुख्यमंत्र्यांकडे पत्राद्वारे केली आहे.
दुष्काळ सदृष्य परिस्थितीत उर्वरीत ११ मंडळाचा समावेश करुन जिल्हयातील सर्व मंडळांतील शेतकऱ्यांना NDRF व SDRF च्या निकषाप्रमाणे तत्काळ मदत करण्यात यावी, असे पत्रामध्ये म्हटले आहे.
आमदार पाटील यांनी म्हटले आहे की,धाराशिव जिल्ह्यात २०२३ मध्ये सरासरीपेक्षा कमी पर्जन्यमान झाले असून, शेतकऱ्यांच्या उत्पन्नात मोठ्या प्रमाणात घट झाली आहे. त्यामुळे शासनाने धाराशिव, वाशी, व लोहारा तालुक्यामध्ये दुष्काळ जाहीर केला आहे. ५७ महसुल मंडळापैकी ४६ मंडळात दुष्काळ वा दुष्काळ सदृष्य परिस्थिती घोषित केली आहे.
जिल्हयातील २७ मंडळे दुष्काळसदृष्य परिस्थितीच्या कक्षेत घेतली आहेत. मात्र कळंब तालुक्यातील मस्सा (खं) व नायगाव, तुळजापुर तालुक्यातील तामलवाडी, आरळी (बु.) व जळकोट, उमरगा तालुक्यातील बलसुर, बेडगा, भूम तालुक्यातील पाथ्रुड, आष्टा, परंडा तालुक्यातील शेळगाव, पाचपिंपळा अशा ११ मंडळामध्ये दुष्काळ सदृष्य परिस्थिती घोषित केलेली नाही. या मंडळातही पावसाचे सरासरीचे प्रमाण अत्यल्प असल्याने दुष्काळ सदृष्य परिस्थिती घोषित करुन केवळ घोषणा न करता जिल्हयातील सर्व मंडळामध्ये राष्ट्रीय आपत्ती व्यवस्थापन व राज्य आपत्ती व्यवस्थापनच्या निकषाप्रमाणे सर्व शेतकऱ्यांना ठोस व तात्काळ भरीव आर्थिक मदत करण्यात यावी, अशी मागणी आमदार पाटील यांनी केली आहे.
धाराशिव जिल्हयातील दुष्काळ सदृष्य परिस्थितीमधुन वगळलेल्या ११ मंडळाचा जिल्हाधिकारी, धाराशिव यांच्याकडुन अहवाल मागवुन घेऊन या सर्व मंडळांत दुष्काळ सदृष्य परिस्थती घोषित करुन जिल्ह्यातील सर्व मंडळांतील शेतकऱ्यांना राष्ट्रीय आपत्ती व्यवस्थापन व राज्य आपत्ती व्यवस्थापन च्या निकषाप्रमाणे तात्काळ ठोस व भरीव आर्थिक मदत करावी, अशी मागणी आमदार कैलास पाटील यांनी केली आहे.
