आरंभ मराठी / कळंब
गैरव्यवहाराची बातमी प्रसिद्ध केल्याबद्दल दोन व्यक्तींनी एका पत्रकाराला बातमी हटवण्यासाठी दबाव टाकून धमकी दिल्याची घटना उघडकीस आली आहे. NCMC कार्ड गैरव्यवहार प्रकरणातील बातमी प्रसिद्ध केल्याचा राग मनात धरून कळंब येथील पत्रकार संदिप कोकाटे यांना धमकावणाऱ्या दोघांविरुद्ध पत्रकार संरक्षण कायद्याअंतर्गत गुन्हा दाखल करण्यात आला आहे.
शनिवारी (दि.४) कळंब पोलिस ठाण्यात ही कारवाई करण्यात आली असून, संबंधित आरोपींवर भारतीय न्याय संहिता (BNS) तसेच महाराष्ट्र प्रसार माध्यम व्यक्ती आणि प्रसार माध्यम संस्था (हिंसा व मालमत्तेचे नुकसान प्रतिबंध) अधिनियमांतर्गत गुन्हा नोंदविण्यात आला आहे.
मिळालेल्या माहितीनुसार, राज्यभरात सुरू असलेल्या NCMC कार्ड योजनेत काही ठिकाणी गैरव्यवहार होत असल्याच्या तक्रारी येत आहेत. कळंब येथील आगारातही नागरिकांकडून शासनाने निश्चित केलेल्या शुल्काव्यतिरिक्त जादा रक्कम वसूल केली जात असल्याचा प्रकार समोर आला होता. या संदर्भात पत्रकार संदिप कोकाटे यांनी समाजमाध्यमातून बातमी प्रसिद्ध केली होती.
ही बातमी प्रसिद्ध झाल्यानंतर संबंधित एजंटच्या आयडीवर सब-एजंट म्हणून काम करणारे संगमेश मेनकुदळे आणि धीरज उर्फ लाला मालपाणी यांनी कोकाटे यांच्यावर बातमी हटवण्यासाठी दबाव टाकण्यास सुरुवात केली. सुरुवातीला भावनिक आवाहन, त्यानंतर आमिष दाखविण्याचा प्रयत्न करण्यात आला. मात्र, कोकाटे यांनी कोणत्याही दबावाला बळी न पडता हा विषय सातत्याने उचलून धरला.
दरम्यान, गुरुवारी (दि.२) रात्री सुमारे ११ वाजण्याच्या सुमारास संबंधित दोघांनी कोकाटे यांच्या कार्यालयात जाऊन त्यांना धमकावले. तसेच पुन्हा चौकात भेटण्याचा आग्रह करत बातमी डिलीट न केल्यास “बघून घेऊ”, “खोट्या गुन्ह्यात अडकवू” आणि “पैसे मागितल्याची बदनामी करू” अशा स्वरूपाच्या धमक्या दिल्या.
या प्रकरणी पत्रकार संदिप कोकाटे यांच्या फिर्यादीवरून कळंब पोलिस ठाण्यात संगमेश मेनकुदळे व धीरज उर्फ लाला मालपाणी यांच्या विरोधात भारतीय न्याय संहितेच्या कलम 351(2), 3(5) तसेच महाराष्ट्र प्रसार माध्यम व्यक्ती आणि प्रसार माध्यम संस्था (हिंसा व मालमत्तेचे नुकसान प्रतिबंध) अधिनियमाच्या कलम 3 व 5 अन्वये गुन्हा दाखल करण्यात आला आहे. पुढील तपास पोलीस करत आहेत.
