प्रतिनिधी / धाराशिव
नुकत्याच झालेल्या नीट(NEET), १० वी व १२ वीच्या परीक्षेत घवघवीत यश संपन्न केलेल्या विद्यार्थ्यांचा त्यांच्या पालकांच्या उपस्थितीत श्री सिध्दीविनायक परिवारातर्फे सत्कार करण्यात आला तसेच विद्यार्थ्यांना पुढील शैक्षणिक वाटचालीस शुभेच्छा देण्यात आल्या. हा कार्यक्रम श्री सिध्दीविनायक परिवाराचे संस्थापक दत्ताभाऊ कुलकर्णी यांच्या अध्यक्षतेखाली घेण्यात आला.
सर्व उत्तीर्ण विद्यार्थ्यांना व पालकांना कुलकर्णी यांनी मोलाचे मार्गदर्शन केले. यशाचे शिखर गाठणाऱ्या विद्यार्थ्यांचे जितके कष्ट आहे त्यापेक्षा जास्त त्यांच्या पालकांचे कष्ट आहेत.आपल्या पाल्याला इतक्या मोठ्या गुणाने उत्तीर्ण करण्यामागे पालकांचाही तितकाच समावेश आहे. विद्यार्थ्यांनी शैक्षणिक जीवनात यश संपादन करण्यासाठी आपली संकल्प शक्ती नेहमीच जागृत ठेवून जिद्द, स्वयंशिस्त आणि स्वयं अध्यायानातील अशा महत्त्वपूर्ण गोष्टींकडे लक्ष दिल्यास ध्येयपप्राप्ती निश्चित होते असे परिवाराचे संस्थापक दत्ताभाऊ कुलकर्णी यांनी सांगितले.
यावेळी बालाजी तांबे, नगरसेवक अभिजीत काकडे, दाजीआप्पा पवार, श्री सिध्दीविनायक मल्टीस्टेटचे मुख्य कार्यकारी अधिकारी राजकुमार जाधव, श्री सिध्दीविनायक डिस्ट्रिक्टचे मुख्य कार्यकारी अधिकारी अरविंद गोरे तसेच श्री सिध्दीविनायक परिवारातील अधिकारी, कर्मचारी उपस्थित होते.