प्रतिनिधी / धाराशिव
शहरातील रखडलेली मुख्य विकास कामे करुन शहराच्या सौंदर्यात भर टाकता यावी,यासाठी मुख्यमंत्री एकनाथ शिंदे, पालकमंत्री प्रा.डॉ.तानाजीराव सावंत यांनी तातडीने १४ कोटी रुपयांचा विशेष निधी उपलब्ध करुन दिला असल्याची माहिती शिवसेनेचे (बाळासाहेब ठाकरे गट) जिल्हाप्रमुख सुरज साळुंके यांनी दिली आहे.दरम्यान, यातील बहुतांश कामे रद्द करण्यात आली होती, त्या कामांना नव्याने मंजुरी देण्यात आली आहे.
वर्षांपूर्वी नवीन सरकार स्थापन झाल्यानंतर पूर्वीच्या कामातील निविदा प्रक्रियेवर प्रश्नचिन्ह उपस्थित करत या कामांना आधी स्थगिती देण्यात आली होती, त्यानंतर ही कामे रद्द करून पुन्हा मंजुरी देण्यात आली आहे. जिल्हाप्रमुख साळुंके म्हणाले की, धाराशिव शहरातील उद्यान विकसीत करणे, आठवडे बाजार विकसीत करणे व नवीन सिमेंट कॉक्रिट रस्ते आदी विकास कामे करण्यासाठी आपण सातत्याने प्रयत्न केले होते.वैशिष्टयपूर्ण योजने अतंर्गत शहरातील आठवडी बाजार येथे भाजी मार्केट व मटन मार्केट विकसित करण्यासाठी ५ कोटी रुपये तर साळुंके नगर येथे ओपन स्पेसमध्ये कंपाऊंड वॉल व गार्डन विकसीत करण्यासाठी ३ कोटी रुपये, पोलीस लाईन येथील कालिका माता मंदीरासमोर ओपन स्पेसमध्ये कंपाऊंड वॉल व गार्डन विकसीत करण्यासाठी २ कोटी रुपये, वैराग रोड येथील गार्डन विकसीत करण्यासाठी १ कोटी रुपये तर राम नगर येथे ठोंबरे यांच्या घरासमोर ओपन स्पेसमध्ये कंपाऊंड वॉल व गार्डन विकसीत करण्यासाठी १ कोटी रुपये, विशेष रस्ता अनुदान योजनेतून योजनेतून नगरपरिषद अंतर्गत नगर परिषदेअंतर्गत नवीन सिमेंट काँक्रीट रस्ते बनविण्यासाठी २ कोटी रुपये असा एकूण १४ कोटी रुपयांचा निधी मंजूर करण्यात आला आहे.दरम्यान ही विकास कामे तातडीने सुरू झाली तर शहराच्या विकासात नक्कीच भर पडणार आहे.
