आरंभ मराठी / धाराशिव
वाशी तालुक्यातील मौजे दसमेगाव शिवारात
अवैध अफू लागवड केल्याप्रकरणी स्थानिक गुन्हे शाखेने (एलसीबी) बुधवारी (दि.११) धडक कारवाई करत तब्बल ४८५.६५ किलो वजनाची, सुमारे ७२ लाख ८४ हजार ७५० रुपयांची अफूची झाडे जप्त केली. या प्रकारामुळे सर्वत्र खळबळ उडाली असून, कांद्याच्या पिकात आंतरपीक म्हणून अफूची लागवड करण्यात आल्याचे उघड आले. हा प्रकार वाशी तालुक्यातील मौजे दशमेगाव शिवारात उघडकीस आला.
या प्रकरणी समाधान मनोहर उघडे (रा. दशमेगाव, ता. वाशी, जि. धाराशिव) याच्याविरुद्ध एनडीपीएस कायद्यान्वये गुन्हा दाखल करण्यात आला आहे. यासंबधी सविस्तर माहिती अशी की, पोलीस अधीक्षक श्रीमती रितू खोखर यांना गोपनीय माहिती मिळाली की, दशमेगाव येथील सर्वे क्रमांक १६३ मधील शेतात कांद्याच्या आंतरपिकामध्ये लपवून अफूची लागवड करण्यात आली आहे. त्यानुसार त्यांनी स्थानिक गुन्हे शाखेचे पोलीस निरीक्षक विनोद इज्जपवार यांना तात्काळ कारवाईचे आदेश दिले. त्यांच्या मार्गदर्शनाखाली सहाय्यक पोलीस निरीक्षक सुदर्शन कासार व पथकाने संबंधित ठिकाणी भेट देऊन खात्री केली असता, कांद्याच्या पिकामध्ये मोठ्या प्रमाणात पांढऱ्या-गुलाबी फुलांची व मोठ्या बोंडांची अफूची झाडे आढळून आली.
सदर शेत समाधान उघडे याचे असून त्यानेच स्वतःच्या फायद्यासाठी विनापरवाना अफूची लागवड केल्याची माहिती परिसरातील शेतकऱ्यांनी दिली. त्यानंतर नायब तहसीलदार वाशी किसन सांगळे व दोन शासकीय पंचांच्या उपस्थितीत पंचनामा करून एकूण ४८५.६५ किलो वजनाची अफूची झाडे जप्त करण्यात आली. या प्रकरणी सहाय्यक पोलीस निरीक्षक सुदर्शन कासार यांनी दिलेल्या फिर्यादीवरून पोस्टे वाशी येथे गु.र.नं. ४५/२०२६ कलम ८ (क) सह १८, एनडीपीएस कायदा १९८५ अन्वये गुन्हा नोंद करण्यात आला आहे. पुढील तपास सुरू आहे.
ही कारवाई पोलीस अधीक्षक श्रीमती रितू खोखर, अपर पोलीस अधीक्षक श्रीमती शफकत आमना यांच्या मार्गदर्शनाखाली करण्यात आली. यात प्रशिक्षक भापोसे अधिकारी मेघना आय.एन., पोनि विनोद इज्जपवार, सपोनि सुदर्शन कासार, पोह शौकत पठाण, जावेद काझी, दत्तात्रय राठोड, दयानंद गादेकर, पोना अशोक ढगारे, चापोह सुभाष चौरे, नागनाथ गुरख तसेच पोस्टे वाशीचे सपोनि यशवंत घोडके, पोह बोरकर, जगताप, मिसाळ, खैरे, घुले आदींचा सहभाग होता.
