आरंभ मराठी /कळंब
शहराच्या अस्मितेचे प्रतीक आणि तब्बल २७ वर्षे सामाजिक, राजकीय चळवळींचा साक्षीदार राहिलेला छत्रपती शिवाजी महाराजांचा भव्य अश्वारूढ पुतळा बुधवारी (दि. १४) सायंकाळी साडेसहाच्या सुमारास विधिवत पूजन करून तात्पुरता उतरविण्यात आला. पुतळ्याच्या चबुतऱ्याची उंची वाढवून सुशोभीकरण करण्यात येणार आहे. मात्र, गेली २७ वर्षे शहराची शान असलेला पुतळा नजरेआड होताच शिवाजी महाराज चौक काहीसा सुना आणि उदास भासू लागला.
२६ एप्रिल १९९८ मध्ये तत्कालीन मुख्यमंत्री मनोहर जोशी यांच्या हस्ते या पुतळ्याचे अनावरण झाले होते. शिवसेनेचे तत्कालीन जिल्हाप्रमुख नेते स्व. नरसिंगअण्णा जाधव यांनी पुतळा उभारणीसाठी विशेष पाठपुरावा केला होता. कोल्हापूर येथील स्व.बी.आर.खेडकर यांनी अडीच टन वजनाचा ब्राँझ चा पुतळा साकारला होता.त्यावेळी बाबुराव काजळे नगराध्यक्ष होते. तेव्हापासून हा पुतळा कळंबच्या सामाजिक, राजकीय आणि सांस्कृतिक इतिहासाचा अविभाज्य भाग बनला.
अनेक आंदोलने, मोर्चे आणि सामाजिक उपक्रमांची सुरुवात याच पुतळ्याला अभिवादन करून झाली. भव्य शिवजयंती उत्सवासाठी प्रसिद्ध असलेल्या कळंब शहरात हा देखणा अश्वारूढ पुतळा आकर्षणाचे केंद्र ठरला होता.
पुतळ्याच्या चौथऱ्याची उंची वाढविण्यासाठी गेल्या सात-आठ वर्षांपासून मराठा सेवा संघ, संभाजी ब्रिगेड, छावा संघटना, व्यापारी संघ, स्वराज्य रक्षक संभाजी महाराज प्रतिष्ठान, शिवाई प्रतिष्ठान, वीर भगतसिंग विद्यार्थी परिषद यांच्यासह शिवप्रेमींनी सातत्याने निवेदने देत आंदोलने केली.
अखेर या मागणीला यश आले असून शासनाकडून भरीव निधी मंजूर झाला आहे.या नगरपालिकेनेही अतिरिक्त पाच लाख रुपयांची तरतूद केली आहे. सदरील पुतळ्याच्या रंगकाम व इतर सुशोभीकरणासाठी छत्रपती संभाजीनगर येथे नेण्यात आला आहे.
पुतळा उतरविताना नगराध्यक्षा सुनंदाताई कापसे, बाजार समितीचे सभापती शिवाजी कापसे, शिवसेना नेते अजित पिंगळे, उपनगराध्यक्ष लखन गायकवाड, नगरसेवक संजय मुंदडा, अतुल कवडे, हर्षद अंबुरे, भूषण करंजकर, संभाजी ब्रिगेडचे प्रदेश संघटक अतुल गायकवाड, भाजपचे माणिक बोंदर, बांधकाम विभागाचे उपअभियंता प्रकाश धस आदी उपस्थित होते.
_
शिवरायांच्या पुनरागमनाची प्रतीक्षा!
गेली २७ वर्षे शिवजयंती उत्सव, सामाजिक आंदोलने आणि असंख्य ऐतिहासिक क्षणांचा साक्षीदार असलेला हा पुतळा तात्पुरता हटविल्याने चौकाचे रूपच पालटले. शिवप्रेमींच्या प्रदीर्घ पाठपुराव्यानंतर आता उंच चबुतरा, रंगरंगोटी आणि सुशोभीकरणासह शिवरायांचा पुतळा पुन्हा दिमाखात विराजमान होणार आहे. त्यामुळे कळंबकरांना आता शिवरायांच्या पुनरागमनाची प्रतीक्षा लागली आहे.
