आरंभ मराठी / धाराशिव
धाराशिव शहरातील राजकीय घडामोडींना वेग आला असून काँग्रेस पक्षाला मोठा धक्का बसला आहे. धाराशिव नगरपालिकेतील दोन विद्यमान नगरसेवकांनी काँग्रेसला रामराम करत आज भारतीय जनता पक्षात जाहीर प्रवेश केला.
मुंबई येथील भाजपच्या मुख्यालयात हा पक्षप्रवेश पार पडला. काँग्रेसचे नगरपालिकेतील गटनेते नगरसेवक सिद्धार्थ बनसोडे आणि नगरसेवक अक्षय जोगदंड यांनी भाजपमध्ये प्रवेश करून काँग्रेसला धक्का दिला आहे.
आमदार राणाजगजितसिंग पाटील यांच्या नेतृत्वाखाली तसेच ग्रामविकास मंत्री जयकुमार गोरे यांच्या हस्ते हा प्रवेश सोहळा संपन्न झाला. या प्रसंगी भाजपचे शहर प्रमुख अमित शिंदे, नगरसेवक राहुल काकडे, नगरसेवक अक्षय ढोबळे, माजी नगरसेवक दत्ता पेठे, तसेच नगरसेवक अभिजीत पतंगे यांची उपस्थिती होती. चार महिन्यांपूर्वी झालेल्या धाराशिव नगरपालिकेच्या निवडणुकीत काँग्रेसने १० जागांवर उमेदवार उभे करून त्यापैकी ३ ठिकाणी विजय मिळवला होता.
मात्र आता त्या तीनपैकी २ नगरसेवकांनी पक्षत्याग करून भाजपमध्ये प्रवेश केल्यामुळे काँग्रेसकडे फक्त एकच नगरसेवक उरला आहे. या घडामोडीमुळे धाराशिवमध्ये काँग्रेसची संघटना आणखी कमकुवत झाल्याचे चित्र दिसत आहे. आधीच विस्कळीत झालेल्या पक्ष संघटनेसमोर आता नव्याने उभारी घेण्याचे मोठे आव्हान निर्माण झाले असून स्थानिक राजकारणात भाजपची ताकद वाढल्याचे स्पष्ट झाले आहे.
