आरंभ मराठी / धाराशिव
जिल्हा पोलीस दलातील शिस्त आणि जबाबदारी अबाधित राखण्यासाठी जिल्हा पोलीस प्रशासनाने कठोर पाऊल उचलत येरमाळा पोलीस ठाण्यात कार्यरत असलेले सहाय्यक पोलीस निरीक्षक टी. आर. भालेराव यांना तात्काळ निलंबित केले आहे. ही कारवाई जिल्हा पोलीस अधीक्षकांच्या आदेशानुसार करण्यात आली आहे.
मिळालेल्या माहितीनुसार, सहाय्यक पोलीस निरीक्षक टी. आर. भालेराव यांनी येरमाळा पोलीस ठाण्याचा प्रभारी अधिकारी म्हणून कार्यभार सांभाळत असताना विविध प्रकरणांच्या हाताळणीत कर्तव्यात निष्काळजीपणा दाखवल्याचे निदर्शनास आले. तसेच जबाबदारी पार पाडताना त्यांच्याकडून गंभीर स्वरूपाचे दुर्लक्ष झाल्याचे चौकशीत स्पष्ट झाले आहे.
या निष्काळजीपणामुळे पोलीस विभागाच्या कार्यक्षमतेवर परिणाम होण्याची शक्यता लक्षात घेऊन त्यांच्याविरुद्ध शिस्तभंगाची कारवाई करण्यात आली. त्यानुसार त्यांना तात्काळ प्रभावाने निलंबित करण्याचे आदेश जारी करण्यात आले आहेत. याबाबत जिल्हा पोलीस अधीक्षकांनी स्पष्ट भूमिका मांडताना सांगितले की, पोलीस विभागात शिस्त, जबाबदारी आणि कर्तव्यदक्षता यांना सर्वोच्च प्राधान्य दिले जाते.
कोणत्याही अधिकारी अथवा कर्मचाऱ्याकडून कर्तव्यात हलगर्जीपणा अथवा निष्काळजीपणा झाल्यास त्याची गंभीर दखल घेतली जाईल. अशा प्रकारच्या प्रकरणांमध्ये कोणतीही सहनशीलता दाखविली जाणार नाही आणि संबंधितांवर नियमानुसार कठोर कारवाई केली जाईल.
