आरंभ मराठी / येरमाळा
येडेश्वरी यात्रेदरम्यान महिला भाविकांच्या गळ्यातील सोन्याचे मंगळसूत्र चोरणाऱ्या टोळीचा स्थानिक गुन्हे शाखेने पर्दाफाश करून तिघांना अटक केली आहे. यात्रेतील गर्दीचा फायदा घेत महिलांच्या दागिन्यांवर डल्ला मारणाऱ्या या टोळीला पोलिसांनी तत्परतेने जेरबंद केले. पोलीस निरीक्षक विनोद इज्जपवार (स्थानिक गुन्हे शाखा, धाराशिव) यांच्या आदेशानुसार यात्रेतील गर्दीच्या ठिकाणी चोरीसारखे गुन्हे घडू नयेत यासाठी पथकाकडून पायी गस्त घालण्यात येत होती.
यावेळी गुप्त बातमीदारामार्फत माहिती मिळाली की, आमराई परिसरातील मंदिराजवळ दोन महिला व एक पुरुष संशयास्पदरीत्या फिरत असून ते चोरीच्या उद्देशाने गर्दीत वावरत आहेत. या माहितीच्या आधारे पथकाने तत्काळ घटनास्थळी जाऊन संशयितांवर पाळत ठेवली. काही वेळ निरीक्षण केल्यानंतर ते गर्दीत चोरी करण्याचा प्रयत्न करत असल्याचे निदर्शनास आले.
त्यानंतर पोलिसांनी त्यांना ताब्यात घेत येरमाळा पोलीस ठाण्यात आणून चौकशी केली. चौकशीत आरोपींनी आपली नावे अनिल शेषेराव शिंदे (वय 34), सुनिता अनिल शिंदे (वय 29) आणि हिराबाई रमेश शिंदे (वय 40, सर्व रा. इंदिरानगर पाथरी, ता. पाथरी, जि. परभणी) अशी सांगितली. त्यांच्या वर्तनावर संशय आल्याने पंचासमक्ष अंगझडती घेतली असता अनिल शिंदे याच्या पँटच्या खिशातून चार वेगवेगळे सोन्याचे मनी मंगळसूत्र आढळून आले.
याबाबत विचारणा केली असता आरोपींनी कबुली दिली की, सकाळी 7 ते 9 वाजण्याच्या दरम्यान येरमाळा-बीड महामार्गावरील पुलाजवळ भाविकांसाठी करण्यात आलेल्या अंघोळीच्या ठिकाणी गर्दीचा फायदा घेत महिलांच्या गळ्यातील मंगळसूत्र चोरून ते अनिल शिंदे याच्याकडे जमा केले जात होते. सदर कारवाईत एकूण 1 लाख 31 हजार रुपयांच्या किंमतीचे चार सोन्याचे मंगळसूत्र जप्त करण्यात आले असून पुढील तपास सुरू आहे.
कारवाई पोलीस अधीक्षक श्रीमती रितु खोखर व अपर पोलीस अधीक्षक श्रीमती शफकत आमना यांच्या मार्गदर्शनाखाली पोलीस निरीक्षक विनोद इज्जपवार, सपोनि सचिन खटके, पोलीस हवालदार विनोद जानराव, नितीन जाधवर, बबन जाधवर, महिला पोलीस शोभा बांगर, महेबूब अरब, रोहित दंडनाईक या पथकाने पार पाडली.
