आरंभ मराठी / भूम
अवैध सावकारीच्या व्यवहारातून तरुणाला मारहाण करून तब्बल तीन लाख रुपयांची खंडणी मागितल्याप्रकरणी भुम पोलीस ठाण्यात चौघांविरुद्ध गुन्हा नोंदविण्यात आला आहे. ही घटना ३० जानेवारी ते १० फेब्रुवारी २०२६ दरम्यान भुम शहरात घडल्याचे फिर्यादीत नमूद आहे.
याबाबत मिळालेल्या माहितीनुसार, फिर्यादी विनित सुनिल शेटे (वय २०, रा. कसबा भुम, ता. भुम, जि. धाराशिव) यांनी १० फेब्रुवारी २०२६ रोजी भुम पोलीस ठाण्यात दिलेल्या प्रथम खबरेवरून आरोपी दशरथ उर्फ दादा काळे, बापु आप्पा काळे, छायाबाई दशरथ उर्फ दादा काळे व सरस्वती बापु काळे (सर्व रा. कल्याण नगर, भुम, ता. भुम, जि. धाराशिव) यांच्याविरुद्ध गुन्हा दाखल करण्यात आला आहे.
फिर्यादीनुसार, विनित शेटे यांनी आरोपींकडून ३० हजार रुपये आठवड्याला २० टक्के व्याजदराने घेतले होते. त्यानंतर आरोपींनी जादा व्याज आकारून एका महिन्यातच ६० हजार रुपये वसूल केले. एवढी रक्कम परत करूनही आरोपींनी समाधान न मानता आणखी तीन लाख रुपयांची जबरदस्तीने मागणी केली.
पैसे न दिल्यास उचलून नेण्याची धमकी देत शिवीगाळ व लाथाबुक्यांनी मारहाण केल्याचा आरोप फिर्यादीने केला आहे. या प्रकरणी भुम पोलीस ठाण्यात भारतीय न्याय संहिता कलम ३०८(२), ३५२, ३(५) तसेच महाराष्ट्र सावकारी (नियमन) अधिनियम २०१४ चे कलम ३९, ४४, ४५ अन्वये गुन्हा नोंदविण्यात आला आहे.
