आरंभ मराठी / धाराशिव
छत्रपती संभाजीनगर जिल्ह्यातील कन्नड तालुक्याचे तहसीलदार विद्याचरण कडावकर यांची धाराशिव जिल्ह्याच्या निवासी उपजिल्हाधिकारी (Resident Deputy Collector) पदावर नियुक्ती करण्यात आली आहे.
कडावकर यांची ही तहसीलदार पदावरून उपजिल्हाधिकारी पदावर झालेली पदोन्नती असून, त्यांची पहिलीच नियुक्ती धाराशिव जिल्ह्यात झाली आहे. विद्याचरण कडावकर यांनी यापूर्वी परभणी आणि जालना जिल्ह्यातील अंबड येथे तहसीलदार म्हणून यशस्वीपणे कार्य केले आहे.
त्यानंतर त्यांची बदली तत्कालीन रेल्वे राज्यमंत्री रावसाहेब दानवे यांच्या दिल्ली येथील कार्यालयात झाली होती. तेथे त्यांनी काही काळ काम पाहिल्यानंतर त्यांची छत्रपती संभाजीनगर जिल्ह्यातील कन्नड तालुक्याचे तहसीलदार म्हणून नेमणूक करण्यात आली होती.
सेवाज्येष्ठतेनुसार त्यांची उपजिल्हाधिकारी पदावर पदोन्नती करण्यात आली असून, शासनाने त्यांना धाराशिव येथे निवासी उपजिल्हाधिकारी म्हणून नियुक्त करण्याचा निर्णय घेतला आहे.
दरम्यान, धाराशिवच्या निवासी उपजिल्हाधिकारी शोभा जाधव यांची अलीकडेच परभणी जिल्ह्यात बदली करण्यात आली होती. त्यांच्या जागी शासनाने पूर्वी उदय किसवे यांची नियुक्ती केली होती.
उदय किसवे हे जमीन घोटाळा प्रकरणात निलंबित अधिकारी असल्यामुळे त्यांच्या नियुक्तीवर जिल्ह्यात विरोधाचे सूर उमटले होते. ‘दैनिक आरंभ मराठी’ने यासंदर्भात आवाज उठवला. उदय किसवे हे धाराशिव जिल्ह्यात रुजू झाले नाहीत.
महसूल आणि वन विभागाने दिनांक ११ नोव्हेंबर रोजी नवीन शासननिर्णय काढत उदय किसवे यांच्या नियुक्तीच्या आदेशात अंशतः बदल करून विद्याचरण कडावकर यांची नियुक्ती केली.
विद्याचरण कडावकर हे आज किंवा उद्या धाराशिव येथे पदभार स्वीकारण्याची शक्यता आहे.
