आरंभ मराठी / तुळजापूर
श्री तुळजाभवानी मंदिरात सध्या जीर्णोद्धाराचे काम सुरू असून, पुरातत्त्व खात्यामार्फत देवीजींच्या सिंहाच्या गाभाऱ्यात दिनांक १ ऑगस्टपासून काम सुरू झाले आहे.
सुरुवातीला मंदिर संस्थांनने हे काम १० ऑगस्टपर्यंत पूर्ण होण्याची शक्यता वर्तवली होती. त्यामुळे १० ऑगस्ट पर्यंत धर्मदर्शन आणि पेड दर्शन बंद ठेवण्याचा निर्णय घेण्यात आला होता.
मात्र आता हे काम २० ऑगस्टपर्यंत चालणार असून, त्यामुळे दिनांक २० ऑगस्ट पर्यंत श्री देवीजींचे मंदिर भाविकांसाठी धर्मदर्शन तसेच पेड दर्शन बंद असणार आहेत.
या काळात मुखदर्शन, सिंहासन पूजा, अभिषेक पूजा व इतर धार्मिक विधी मात्र नियमितपणे चालू राहणार आहेत. याबाबत सर्व महंत, पुजारी, सेवेकरी व भाविकांनी याची नोंद घ्यावी असे आवाहन मंदिर संस्थांनतर्फे करण्यात आले आहे.
