केंद्र सरकारने मागणीचा विचार केल्यास मराठवाडा होऊ शकतो दुष्काळमुक्त
प्रतिनिधी / मुंबई
शिर्डी लोकसभा मतदारसंघातील पाणीटंचाई तसेच मराठवाड्यातील 5 जिल्ह्यातील पाणी टंचाई कायमस्वरूपी दूर करण्यासाठी घाटमाथ्याचे 115 टीएमसी पाणी शेतक-यांना उपलब्ध व्हावे, अशी मागणी करण्यात आली आहे. या नव्या मागणीने मराठवाड्यातील शेतकऱ्यांची पाणी समस्या समोर आली असून, केंद्र सरकार याबाबत कोणती भूमिका घेणार याकडे लक्ष लागले आहे.
अहमदनगर (शिर्डी), नाशिक व मराठवाड्यातील पाच जिल्ह्यांना 115 टीएमसी पाणी उपलब्ध होण्याची मागणी शिर्डी लोकसभा मतदारसंघाचे खासदार सदाशिवराव लोखंडे यांनी लोकसभेच्या शीतकालीन सत्राच्या शून्यप्रहरात प्रधानमंत्री नरेंद्र मोदी यांच्याकडे केली.
ते म्हणाले, सह्याद्री पर्वतरांगातून समुद्राकडे वाहून जाणारे घाटमाथ्यातील पाणी अडवल्यास 115 टीएमसी पाणी उपलब्ध होऊ शकते. यापैकी 15 टीएमसी पाणी मुळा, गोदावरी व प्रवरा नद्यांवर कोल्हापुरी पद्धतीचे बंधारे बांधून या पाण्याचा उपयोग शेतकऱ्यांसाठी कायमस्वरूपी केला जाऊ शकतो. तसेच उर्वरित 5 टीएमसी पाणी अकोले, संगमनेर, कोपरगाव व श्रीरामपूर या चार तालुक्यातील वंचित शेतकऱ्यांना उपलब्ध होईल. असे एकूण 20 टीएमसी पाणी शिर्डी मतदारसंघात उपलब्ध होऊ शकेल व पाण्याची समस्या सुटण्यास मदत होईल. यासोबतच नाशिकसाठी 10 टीएमसी व उर्वरित 85 टीएमसी पाणीसाठा मराठवाड्यातील पाच जिल्ह्यांसाठी उपलब्ध होण्याबाबतची मागणी श्री.लोखंडे यांनी लोकसभा अध्यक्षांमार्फत प्रधानमंत्री नरेंद्र मोदी यांच्याकडे केली. तसेच यासाठी राज्य शासनाकडून याबाबत सविस्तर प्रस्ताव मागवून व त्यास केंद्रसरकारने मंजूरी देण्याबाबतची विनंतीही केली.या मागणीचा विचार झाल्यास मराठवाड्यातील पाणी समस्या कायमस्वरूपी मिटू शकते.
