प्रतिनिधी / धाराशिव
धुळे-सोलापूर या राष्ट्रीय महामार्गावर धाराशिव येथील तेरणा कॉलेज समोरील छत्रपती शाहू महाराज चौकात भीषण अपघात झाला आहे. याच महामार्गावर कळंब तालुक्यातील धाराशिव साखर कारखान्याच्या परिसरात वर्षापूर्वी झालेल्या अपघाताची पुनरावृत्ती झाली आहे. दोन मालवाहू ट्रकचा एकमेकांवर समोरून आदळल्यामुळे हा अपघात झाला. या अपघातात कोणतीही जीवितहानी झाली नाही, परंतु यामध्ये एका ट्रकचालकाच्या पायाला गंभीर दुखापत झाल्याची माहिती आहे.
मिळालेल्या माहितीनुसार धाराशिवच्या एमआयडीसीच्या पुलावरून सोलापूरकडे जाणारा मालवाहू ट्रक भरधाव वेगाने जात होता. या पुलावरून डीमार्टकडे जाणारा रस्ता तीव्र उताराचा असल्यामुळे ट्रकचालकाचे गाडीवरील नियंत्रण सुटले आणि हा ट्रक भरधाव वेगात डिव्हायडरच्या पलीकडे जाऊन विरुद्ध बाजूने जाणाऱ्या दुसऱ्या ट्रकवर आदळला. अपघातावेळी दोन्ही वाहने समोरासमोर धडकल्यामुळे प्रचंड मोठा आवाज झाला. या अपघातात दोन्ही गाड्यांचे समोरील भाग तुटून पडले. अपघात घडताच जवळच्या नागरिकांनी घटनास्थळी धाव घेतली. यामध्ये एका चालकाच्या पायाला गंभीर दुखापत झाल्याची माहिती मिळाली. अपघात झाल्यावर काही वेळ महामार्गावरील वाहतूक विस्कळीत झाली होती.
डी.मार्ट ते सर्किट हाऊस अपघातप्रवण क्षेत्र
शहरातील डी. मार्ट ते सर्किट हाऊस हा रस्ता अपघातप्रवण क्षेत्र बनत चालला आहे. महिन्याला एखादा तरी भीषण अपघात या रस्त्यावर होत आहे. डी.मार्ट, पोदार इंटरनॅशनल स्कुल यामुळे हे गर्दीचे क्षेत्र आहे. त्यात या मार्गावर सर्व्हिस रोड नाही, त्यामुळे या मार्गावरून रहदारी करणे कठीण आहे. त्यातच महामार्गावर तीव्र उताराचा रस्ता असल्यामुळे हा रस्ता मृत्यूचा सापळा ठरत आहे.
