शहरातील बालाजी नगर पोलिसांचा छापा, अनैतिक देह व्यापार करणा-या विरुद्ध कारवाई
आरंभ मराठी / धाराशिव
वेश्या व्यवसाय करणाऱ्या 3 महिलांची सुटका करत पोलिसांनी व्यवसाय करून घेणाऱ्या एका महिलेला अटक केली आहे.ही कारवाई शहरातील बालाजी नगर परिसरात करण्यात आली असून, याप्रकरणी शहर पोलिस ठाण्यात गुन्हा दाखल करण्यात आला आहे.
धाराशिव शहरातील बालाजी नगर येथे सुरू असलेल्या वेश्या व्यवसायाची पोलिसांच्या विशेष पथकाने भांडाफोड करून त्यावर कारवाई केली. जिल्ह्यात सुरू असलेल्या अवैध धंद्यांविषयी माहिती काढून कायदेशीर कारवाई करण्यासाठी पोलिसांचे विशेष पथक स्थापन करण्यात आले आहे. या पथकास सोमवारी (दि.११) गुप्त माहिती मिळाली की, शहरातील बालाजी नगर या भागात एक महिला काही महिलांकडून वेश्या व्यवसाय करून घेत आहे. मिळालेल्या महितीच्या आधारे पोलिसांनी छापा टाकला असता, पोलिसांना एका घरात तीन महिला आढळून आल्या. पोलिसांनी त्यांची विचारपूस केली असता, भाग्यश्री नारायण इंगळे ( 40 वर्षे, रा. बालाजीनगर, शेकापुर रोड, धाराशिव) ही महिला त्या ठिकाणी काही महिलांना आश्रय देऊन त्या महिलांकडून वेश्या व्यवसाय करून घेत होती, अशी पोलिसांना माहिती मिळाली. यावरुन पोलीस पथकाने भाग्यश्री नारायण इंगळे यांना ताब्यात घेतले. तसेच त्यांच्या ताब्यातील एक मोबाईल फोन, निरोधची पाकीटे व रोख रक्कम असा एकूण 17,508 रुपयांचा माल हस्तगत केला. पोलीसांनी संबंधीत वेश्या व्यवसाय करणाऱ्या महिलांची आरोपीच्या ताब्यातून सुटका केली. भाग्यश्री इंगळे यांच्याविरुध्द गुरनं 105/2024 भा.दं.वि. सं. कलम- 370, सह मानवी अनैतिक व्यवसाय प्रतिबंधक अधिनियम कलम- 3, 4, 5, 7 अन्वये धारशिव शहर पोलीस ठाण्यात गुन्हा दाखल केला आहे. ही कामगिरी पोलीस अधीक्षक अतुल कुलकर्णी व अपर पोलीस अधीक्षक गौहर हसन यांच्या मार्गदर्शनाखाली स्थानिक गुन्हे शाखेचे पोलीस निरीक्षक वासुदेव मोरे, विशेष पथकाचे सपोनि अमोल मोरे, सचिन खटके, पोहेकॉ विनोद जानराव, समाधान वाघमारे, पोलीस नाईक नितीन जाधवर, पोहेकॉ शोभा बांगर, चालक पोहेकॉ लाटे यांच्या पथकाने केली.
