व्याजाच्या पैशासाठी सावकाराकडून मानसिक त्रास; एकाची गळफास घेऊन आत्महत्या,घटनेने खळबळ

प्रतिनिधी / धाराशिव

घेतलेल्या पैशांचे व्याज द्यावे,यासाठी केल्या जाणाऱ्या मानसिक त्रासाला कंटाळून एकाने गळफास घेऊन आत्महत्या केल्याची घटना कळंब तालुक्यातील डिकसळ ते पिंपळगांव रस्त्यावर 18 डिसेंबर रोजी केली होती. याप्रकरणी कळंब पोलिसात आत्महत्येस प्रवृत्त केल्याप्रकरणी सावकारावर गुन्हा दाखल करण्यात आला आहे.

कळंब पोलिसांनी सांगितले की, आण्णासाहेब केरबा काळे (रा. डोळा पिंपळगाव ता. कळंब) यांनी 18.12.2023 रोजी 6.18 वाजेच्या सुमारास डिकसळ ते पिंपळगाव रोडवर फॉरेस्टच्या गायरानजवळ विठ्ठल रघुनाथ बारगुले यांचे शेताच्या कडेला लिंबाच्या झाडाला गळफास घेवून आत्महत्या केली. आरोपी गोविंद बाबुराव शिंदे ( रा. संभाजीनगर डिकसळ ता. कळंब) याच्याकडून घेतलेल्या व्याजाचे पैसे देण्याचा कारणावरुन आरोपीने आण्णासाहेब काळे यांना व्याजाच्या पैशावरुन वेळोवेळी मानसिक त्रास देवून पैशासाठी मयताची पत्नी व मुलगी यांना घेवून जाईन अशी शिवीगाळ करुन धमकी दिली. त्याच्या या जाचास व त्रासास कंटाळून नैराश्यातुन आण्णासाहेब काळे यांनी आत्महत्या केली आहे. मयताचा मुलगा आकाश आण्णासाहेब काळे, (22 वर्षे, रा. डोळा पिंपळगाव, ता. कळंब जि. धाराशिव) यांनी गुरुवारी (दि.28) दिलेल्या तक्रारीवरून कळंब पोलिस ठाण्यात भा.दं.वि. सं. कलम- 306, 504, 506 अन्वये गुन्हा दाखल करण्यात आला आहे.