आरंभ मराठी / धाराशिव
धाराशिव जिल्ह्याचे मुख्यालय असलेल्या धाराशिव पंचायत समितीच्या सभापती व उपसभापती पदासाठी आज (दि.६ मार्च) निवडणूक होत असून या वेळी महिला सभापती विराजमान होणार आहेत. यापूर्वी चार महिलांनी हे पद भूषविले असून आता ६० वर्षांच्या इतिहासात पाचव्यांदा महिला सभापतीची नोंद होणार आहे. महायुतीचे बहुमत असल्यामुळे भाजपचा उमेदवार सभापती होणार हे निश्चित होते.
त्यामुळे सभापतीपदी कोणाची वर्णी लागणार याकडे सर्वांचे लक्ष लागले होते. दुपारी बारापर्यंत उमेदवारी अर्ज दाखल करण्याच्या वेळेत भाजपकडून सभापती पदासाठी एक आणि उपसभापती पदासाठी एक असे दोनच अर्ज दाखल झाल्यामुळे सभापतीपदी कोणाची वर्णी लागणार हे स्पष्ट झाले.
भाजपकडून इर्ला पंचायत समिती गणातून निवडून आलेल्या गोकर्णा गोपाळ कदम या सभापती पदावर विराजमान होणार आहेत, तर वडगाव सिद्धेश्वर गणातून निवडून आलेले प्रमोद पाटील यांची उपसभापती म्हणून निवड होणार आहे. पंचायत समितीच्या २४ गणांसाठी दिनांक ७ फेब्रुवारी रोजी मतदान झाले होते. या निवडणुकीत भारतीय जनता पक्षाने १२ जागा जिंकत आपले वर्चस्व सिद्ध केले, तर शिवसेना (शिंदे गट) २ जागांवर विजयी झाली. याशिवाय भाजप पुरस्कृत एक उमेदवारही विजयी झाला आहे. त्यामुळे महायुतीने मिळून स्पष्ट बहुमत मिळवले आहे.
दुसरीकडे शिवसेना (उद्धव बाळासाहेब ठाकरे गट) आठ जागांवर, तर राष्ट्रवादी काँग्रेस (शरदचंद्र पवार गट) एका जागेवर विजयी झाली आहे. एकूण संख्याबळ पाहता पंचायत समितीवर महायुतीचे स्पष्ट वर्चस्व दिसून येत आहे. धाराशिव पंचायत समिती ही तुळजापूर व धाराशिव-कळंब या विधानसभा मतदारसंघांत विभागली आहे.
तालुक्यातील ७२ गावे तुळजापूर विधानसभा मतदारसंघात समाविष्ट आहेत, तर उर्वरित गावे कळंब मतदारसंघात येतात. यंदाचे सभापतीपद सर्वसाधारण महिला प्रवर्गासाठी आरक्षित असल्यामुळे या प्रवर्गातील भाजपच्या पाच महिला सदस्यांमध्ये चुरस निर्माण झाली होती. अखेर पक्षांतर्गत चर्चेनंतर गोकर्णा गोपाळ कदम यांच्या नावावर एकमत झाले. त्यामुळे त्या धाराशिव पंचायत समितीच्या २१ व्या सभापती ठरणार आहेत.
या निवडणूक प्रक्रियेसाठी धाराशिवचे उपविभागीय अधिकारी ओंकार देशमुख हे पीठासन अधिकारी म्हणून कामकाज पाहत आहेत. धाराशिव पंचायत समितीच्या ६० वर्षांच्या इतिहासात आतापर्यंत २० सभापती होऊन गेले आहेत. त्यापैकी खालील चार महिलांनी विविध कालखंडात सभापतीपद भूषविले आहे –
जयश्री किशोर दाणे (१४ मार्च २००२ ते २० जून २००३)
रुक्मिणी विश्वनाथ माळी (३० जून २००३ ते ९ फेब्रुवारी २००५)
प्रेमलता संजय लोखंडे (१४ मार्च २०१२ ते १५ मे २०१५)
हेमा महेश चांदणे (३१ डिसेंबर २०१९ ते २०२२)
आता गोकर्णा गोपाळ कदम यांच्या रूपाने धाराशिव पंचायत समितीला ६० वर्षांच्या इतिहासात पाचवी महिला सभापती मिळणार आहे.
