आरंभ मराठी / धाराशिव
दरोडा टाकण्याच्या तयारीत असताना पोलिसांचे पथक कारवाईसाठी पोहोचताच पोलिसांवर दगडफेक करून घटनास्थळावरून पसार झालेल्या टोळीचा अखेर स्थानिक गुन्हे शाखेने छडा लावला आहे. गोपनीय माहितीच्या आधारे केलेल्या कारवाईत कळंब तालुक्यातील कन्हेरवाडी शिवारातून दोन प्रमुख आरोपींना ताब्यात घेण्यात आले असून, त्यांच्या चौकशीत या गुन्ह्यात सहभागी असलेल्या एकूण १० आरोपींची नावे निष्पन्न झाली आहेत. या कारवाईमुळे दरोड्याच्या तयारीतील टोळीचा पर्दाफाश झाला आहे.
दि. २ ऑगस्ट २०२६ रोजी दरोडा टाकण्याच्या तयारीत असलेल्या आरोपींवर कारवाई करण्यासाठी पोलिसांचे पथक गेले होते. मात्र, पोलिसांची चाहूल लागताच आरोपींनी पोलिस पथकाच्या दिशेने दगडफेक केली आणि अंधाराचा फायदा घेत घटनास्थळावरून पसार झाले. याप्रकरणी वाशी पोलीस ठाण्यात भारतीय न्याय संहितेच्या (BNS) कलम ३१०(४), ३१०(५), १२१, ३२४ नुसार गुन्हा दाखल करण्यात आला होता.
घटनास्थळाची पोलिसांनी पाहणी केली असता आरोपींकडे दरोडा टाकण्यासाठी वापरण्यात येणारे साहित्य आढळून आले. त्यामुळे हा प्रकार गंभीर असल्याने पोलिसांनी आरोपींचा शोध घेण्यासाठी तपासाची चक्रे वेगाने फिरवली.
दरम्यान, दि. ९ ऑगस्ट रोजी स्थानिक गुन्हे शाखेचे सपोनि. सुदर्शन कासार व त्यांचे पथक मालमत्तेविषयक गुन्हे उघडकीस आणण्याच्या अनुषंगाने पेट्रोलिंग करीत होते. त्यावेळी मिळालेल्या गोपनीय माहितीच्या आधारे आरोपींचा शोध घेण्यात आला. या कारवाईत रामा उर्फ बेल्या शंकर काळे (वय २३) आणि सरदार शंकर काळे (वय २८), दोघे रा. कन्हेरवाडी, ता. कळंब यांना कन्हेरवाडी शिवारातून ताब्यात घेण्यात आले.
पोलिसांनी दोघांची कसून चौकशी केली असता त्यांनी इतर साथीदारांसोबत मिळून दरोडा टाकण्याचा प्रयत्न केल्याची माहिती दिली. त्यानंतरच्या तपासात या गुन्ह्यात सहभागी असलेल्या एकूण १० आरोपींची नावे निष्पन्न झाली आहेत. ताब्यात घेतलेल्या आरोपींची वैद्यकीय तपासणी करून आवश्यक अहवालासह त्यांना वाशी पोलीस ठाण्यात हजर करण्यात आले असून, पुढील कायदेशीर कारवाई सुरू आहे.
दरोड्याच्या तयारीतील टोळीचा शोध घेण्यासाठी स्थानिक गुन्हे शाखेने विविध पातळ्यांवर तपास सुरू केला होता. पेट्रोलिंगदरम्यान मिळालेली गोपनीय माहिती आणि त्याआधारे केलेली अचूक कारवाई पोलिसांसाठी महत्त्वाची ठरली. पोलिसांवर दगडफेक करून पसार झालेल्या आरोपींपर्यंत अखेर स्थानिक गुन्हे शाखा पोहोचली. ही कारवाई पोलीस अधीक्षक श्रीमती रितू खोखर आणि अप्पर पोलीस अधीक्षक सचिन पांडकर यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार, सपोनि. सुदर्शन कासार, पोह. शौकत पठाण, पोह. प्रकाश औताडे, पोह. जावेद काझी, पोह. फरहान पठाण, चापोह. नागनाथ गुरव आणि चापोह. रत्नदीप डोंगरे यांनी संयुक्तरीत्या पार पाडली.
