धाराशिवच्या ‘या’ पाच मुद्द्यांवर उपमुख्यमंत्री फडणवीसांनी घेतली विशेष बैठक, प्रश्न कालमर्यादेत सोडविण्याच्या सूचना

आमदार राणा जगजितसिंह पाटील यांच्या मागणीवरून मंत्रालयातील वरिष्ठ अधिकाऱ्यांच्या उपस्थितीत विकास प्रश्नांवर घेतली स्वतंत्र बैठक

आरंभ मराठी / धाराशिव
विकासाच्या योजनांचा पाठपुरावा सुरू असला तरी प्रशासकीय तसेच शासनाच्या पातळ्यांवर काही प्रश्न प्रलंबित असतात. ही बाब राज्याचे उपमुख्यमंत्री देवेंद्र फडणवीस यांच्याकडे मांडून खास धाराशिव जिल्ह्यातील प्रमुख 5 प्रश्नांची सोडवणूक करण्यासाठी आमदार राणाजगजितसिंह पाटील यांनी वरिष्ठ अधिका-यांची विशेष बैठक बैठक घेण्याची मागणी केली होती.त्यानुसार गुरूवारी मुंबईत सह्याद्री अतिथीगृहात बैठक घेण्यात आली.यावेळी जिल्ह्याला प्रगतीच्या मार्गावर नेणाऱ्या या कामांचा तातडीने निपटारा करण्याच्या सूचना देवेंद्र फडणवीस यांनी अधिकाऱ्यांना दिल्या. यामध्ये कृष्णा मराठवाडा सिंचन प्रकल्पासह तुळजापूर तीर्थक्षेत्र विकास योजना, निम्न तेरणा प्रकल्प,कौडगाव एमआयडीसी, शासकीय वैद्यकीय महाविद्यालयाच्या जागेच्या संदर्भात चर्चा झाली.
जिल्ह्यातील वेगवेगळ्या प्रकल्पांसाठी आमदार राणाजगजितसिंह पाटील यांच्याकडून शासनाकडे सातत्याने पाठपुरावा सुरू आहे.मात्र काही कामांसाठी प्रशासकीय आणि शासनाच्या स्तरावर तांत्र‍िक अडचणी येत आहेत.या सगळ्या प्रश्नांची एकत्रितपणे सोडवणूक व्हावी, यासाठी आमदार राणा पाटील यांनी उपमुख्यमंत्री देवेंद्र फडणवीस यांच्याकडे बैठक घेण्याची मागणी केली होती.त्यानुसार गुरूवारी फडणवीस यांनी खास धाराशिव जिल्ह्यांच्या विकासावर वरिष्ठ अधिकाऱ्यांच्या बैठकीचे आयोजन केले होते. या बैठकीत कृष्णा मराठवाडा सिंचन प्रकल्प, निम्न तेरणा उपसा सिंचन प्रकल्प, कौडगाव येथील एमआयडीसीच्या माध्यमातून उभारण्यात येणारा तांत्रिक वस्त्रनिर्मिती प्रकल्प, तुळजाभवानी मंदिर विकास आराखडा, शासकीय वैद्यकीय महाविद्यालय व रुग्णालयासाठी लागणाऱ्या जागेची उपलब्धता या सर्व महत्त्वाच्या विषयावर सर्वंकष चर्चा झाली तसेच कामांचा निपटारा करण्यासाठी कालमर्यादा ठरवून देण्यात आली. झालेल्या निर्णयांची सक्त अंमलबजावणी करण्याचे निर्देश उपमुख्यमंत्री फडणवीस यांनी बैठकीमध्ये संबंधित अधिकाऱ्यांना दिले. कृष्णा मराठवाडा सिंचन प्रकल्प टप्पा एक अंतर्गत चालू असलेले काम जुलै महिनाअखेर पूर्ण करणे अपेक्षित होते, मात्र तांत्रिक व भूसंपादनाच्या अडचणीमुळे 80 टक्के काम पूर्ण झाल्याचे अधिकाऱ्यांनी बैठकीत सांगितले. या अडचणी दूर करून डिसेंबर अखेरपर्यंत काम पूर्ण करण्याच्या सूचना देवेंद्र फडणवीस यांनी संबंधित अधिकाऱ्यांना दिल्या असून आवश्यकतेनुसार निधी उपलब्ध करून देण्याचे देखील त्यांनी मान्य केले आहे.
निम्न तेरणा उपसा सिंचन योजना दुरुस्तीच्या कामास तांत्रिक मान्यता प्राप्त असून, पुढील आठवड्यात प्रशासकीय मान्यता व निधी उपलब्धतेाठी प्रस्ताव सादर करण्यास जलसंपदा तसेच वित्त व नियोजन विभागाच्या सचिवांना आदेशित करण्यात आले आहे. कौडगांव औद्योगिक वसाहतीमध्ये एमआयडीसीच्या माध्यमातून मंजूर तांत्रिक वस्त्रनिर्मिती प्रकल्पासाठी अँकर युनिट आणणे व तेथील पायाभूत सुविधांची कामे सुरू करण्याच्या सूचना एमआयडीसीच्या मुख्य कार्यकारी अधिकारी यांना देण्यात आल्या तर महाजनकोच्या कार्यकारी संचालकांना उंचवट्यावरील उपलब्ध जागेवर सौर उर्जा निर्मिती प्रकल्प उभारण्याचे सुचित करण्यात आले आहे.या बैठकीसाठी अतिरिक्त मुख्य सचिव नियोजन राजगोपाल देवरा, प्रधान सचिव जलसंपदा दीपक कपूर, वैद्यकीय शिक्षण विभागाचे प्रधान सचिव दिनेश वाघमारे, कौशल्य विकास विभागाचे प्रधान सचिव गणेश पाटील, एमआयडीसीचे मुख्य कार्यकारी अधिकारी विपीन शर्मा, महाजनकोचे व्यवस्थापकीय संचालक लोकेश चंद्रा, कृष्णा खोऱ्याचे कार्यकारी संचालक श्री.त्रिमनवार,धाराशिवचे जिल्हाधिकारी डॉ. सचिन ओंबासे यांच्यासह संबंधित अधिकारी उपस्थित होते.
–
तीर्थक्षेत्र विकास आराखडा उच्चाधिकार समितीकडे सादर करा, जिल्हाधिकाऱ्यांना सूचना
तुळजाभवानी विकास आराखड्याबाबत पुढील आठवड्यात उच्चाधिकार समितीच्या निर्णयासाठी प्रस्ताव सादर करण्याचे ठरले असून, जिल्हाधिकारी यांना तातडीने सदरील प्रस्ताव पाठविण्याचे आदेश देण्यात आले. तसेच छत्रपती संभाजीनगर येथील मंत्रिमंडळाच्या झालेल्या बैठकीतील निर्णयाची तातडीने अंमलबजावणी करून शासकीय वैद्यकीय महाविद्यालय व रुग्णालयासाठी आवश्यक जलसंपदा व कौशल्य विकास विभागाची 12 हेक्टर जागा वैद्यकीय शिक्षण विभागाकडे हस्तांतरीत करून घेण्याची प्रक्रिया तातडीने पूर्ण करून घेण्याचे जिल्हाधिकारी यांना आदेशित करण्यात आले आहे.
–
विकासाला गती मिळेल,
सिंचन प्रकल्पासह जिल्ह्याच्या अत्यंत महत्वाच्या विषयावर उपमुख्यमंत्री फडणवीस यांनी बैठक घेतली. त्यांनी कालबध्द कार्यक्रम आखून अंमलबजावणीच्या सूचना वरिष्ठ अधिकाऱ्यांना दिल्या आहेत. या निर्णयामुळे शेतकऱ्यांना शाश्वत सिंचनासाठी पाणी, युवकांना रोजगार व पर्यटनाच्या माध्यमातून अर्थकारणाला मोठी गती मिळेल, असा विश्वास आहे.
-राणाजगजितसिंह पाटील,आमदार, तुळजापूर