आरंभ मराठी / धाराशिव :
समृद्धी महामार्गावर रात्रीच्या वेळी वाहन पंक्चर करून प्रवाशांना मारहाण करत लूट करणाऱ्या टोळीचा माग काढण्यासाठी नाशिक ग्रामीण पोलिसांनी धाराशिव जिल्ह्यात कोंबिंग ऑपरेशन राबवले. धाराशिव पोलिसांच्या मदतीने वाशी तालुक्यातील खामकरवाडी, तेरखेडा, उमरा आदी भागांत केलेल्या कारवाईत सात संशयितांना ताब्यात घेण्यात आले आहे.
दोन दिवसांपूर्वी नाशिक जिल्ह्यात समृद्धी महामार्गावर दरोडेखोरांनी प्रवाशांची कार अडवून मारहाण केली होती. त्यानंतर सोन्याचे दागिने आणि रोख रक्कम लुटून दरोडेखोर पसार झाले. याशिवाय अन्य काही वाहनांनाही लक्ष्य करण्यात आल्याची माहिती समोर आली होती. या घटनांमुळे समृद्धी महामार्गावरील प्रवाशांच्या सुरक्षेचा प्रश्न ऐरणीवर आला आहे.
या घटनेची गंभीर दखल घेत मुख्यमंत्री देवेंद्र फडणवीस यांनी कडक कारवाईचे आदेश दिल्यानंतर पोलिसांनी तपासाची चक्रे वेगाने फिरवली आहेत. त्याचाच एक भाग म्हणून काल नाशिक ग्रामीण पोलिसांचे पथक धाराशिव जिल्ह्यात दाखल झाले.
धाराशिव पोलिसांच्या सहकार्याने वाशी तालुक्यातील विविध गावांमध्ये संशयितांच्या हालचालींची माहिती घेत कोंबिंग ऑपरेशन करण्यात आले. या कारवाईत सात संशयित पोलिसांच्या ताब्यात आले असून, त्यांची कसून चौकशी सुरू आहे.
या संशयितांकडून समृद्धी महामार्गावरील दरोड्यांबाबत महत्त्वाची माहिती मिळण्याची शक्यता आहे. तपासातून या टोळीचा नेमका सहभाग, इतर साथीदार आणि महामार्गावरील लुटीच्या घटनांशी त्यांचे संबंध उघड होण्याची शक्यता पोलिसांकडून व्यक्त केली जात आहे.
