आरंभ मराठी | वाशी
भुम तालुक्यातील ईट येथील विवाहितेच्या आत्महत्या प्रकरणात वाशी पोलिसांनी पतीसह पाच जणांविरुद्ध आत्महत्येस प्रवृत्त करणे, हुंड्यासाठी छळ करणे व अन्य संबंधित कलमांन्वये गुन्हा दाखल केला आहे. माहेरहून हुंडा आणण्यासाठी दबाव टाकणे तसेच पतीच्या अनैतिक संबंधांमुळे विवाहितेचा शारीरिक व मानसिक छळ झाल्याचा आरोप फिर्यादीत करण्यात आला आहे. यासंबधी सविस्तर वृत्त असे की, निकिता अमरनाथ थोरात (वय २२, रा. ईट, ता. भुम) यांनी १४ जुलै २०२६ रोजी पहाटे साडेचार वाजण्याच्या सुमारास राहत्या घरी गळफास घेऊन आत्महत्या केली होती. या प्रकरणी मृत महिलेची आई जिजाबाई सुदाम कांबळे (वय ४६, रा. लांजेश्वर, ता. भुम) यांनी १७ जुलै रोजी वाशी पोलीस ठाण्यात फिर्याद दिली.
फिर्यादीनुसार, पती अमरनाथ उद्धव थोरात (फौजी), मुद्रुका उद्धव थोरात, उद्धव जगन्नाथ थोरात (सर्व रा. ईट, ता. भुम), गीता अश्विन मोरे (रा. विमाननगर, सम्राट चौक, लेन क्र. १४, पुणे) तसेच अश्विनी पांडुरंग खवळे (वय २२) यांनी निकिता यांना माहेरहून हुंडा आणण्यासाठी वारंवार त्रास दिला. याशिवाय पतीच्या अनैतिक संबंधांच्या कारणावरूनही त्यांचा शारीरिक व मानसिक छळ करण्यात आला. या सततच्या त्रासाला कंटाळून निकिता यांनी आत्महत्या केल्याचा आरोप फिर्यादीत करण्यात आला आहे.
या फिर्यादीवरून वाशी पोलिसांनी संबंधित पाच आरोपींविरुद्ध भारतीय न्याय संहिता (बीएनएस) कलम ८५, १०८, ११५(२), ३५१(२) व ३(५) अन्वये गुन्हा दाखल केला आहे.
