आरंभ मराठी / शिराढोण
धाराशिव जिल्ह्यातील अवैध अफू लागवडीवर पोलिसांनी मोठ्या प्रमाणात कारवाई सुरू केली असून, दररोज वेगवेगळ्या तालुक्यात धाडी टाकून लाख रुपयांचा मुद्देमाल जप्त केला जात आहे. कळंब तालुक्यातील शिराढोण पोलीस ठाणे हद्दीतील लोहटा पश्चिम शिवारात सुरू असलेल्या बेकायदेशीर अफू शेतीचा पोलिसांनी पर्दाफाश केला असून, या प्रकरणात तब्बल ५० किलो ११ ग्रॅम अफूचा मुद्देमाल जप्त करण्यात आला आहे.
या मुद्देमालाची अंदाजे किंमत ७ लाख ५१ हजार ६५० रुपये इतकी असून, पोलिसांनी या प्रकरणी तिघा आरोपींवर गुन्हा दाखल केला आहे. पोलीस सूत्रांकडून मिळालेल्या माहितीनुसार, दिनांक १७ फेब्रुवारी रोजी सायंकाळी ५ वाजण्याच्या सुमारास लोहटा पश्चिम शिवारातील गट क्रमांक १७५, २३६ आणि २२७ येथील शेतांवर पोलिसांनी छापा टाकला.
या छाप्यात शेतांमध्ये कोणतीही अधिकृत परवानगी न घेता आर्थिक फायद्यासाठी प्रतिबंधित अफू पिकाची लागवड करून त्याची जोपासना करण्यात येत असल्याचे उघड झाले. कारवाईदरम्यान पोलिसांनी अफूची बोंडे, फुले आणि पाने यांसह एकूण ५० किलो ११ ग्रॅम वजनाचा मुद्देमाल जप्त केला.
या प्रकरणी पोलीस ठाणे शिराढोण येथे गुन्हा क्रमांक ३३/२०२६ अन्वये कलम ८(C), १८ एन.डी.पी.एस. ॲक्ट १९८५ अंतर्गत गुन्हा दाखल करण्यात आला आहे. या प्रकरणात अशोक ज्ञानोबा अडसूळ (वय ४६), नरसिंग अच्युत अडसूळ (वय ५५) आणि निलेश शिवाजी पवार (वय ३४), सर्व रा. लोहटा पश्चिम (ता. कळंब) यांना दिनांक १८ फेब्रुवारी रोजी पहाटे अटक करण्यात आली.
या संदर्भात सहाय्यक पोलीस निरीक्षक धरणीधर बाबा कोळेकर यांनी फिर्याद दिली आहे. ही धडक कारवाई पोलीस अधीक्षक रितू खोकर, अप्पर पोलीस अधीक्षक शफकात अमना तसेच उपविभागीय पोलीस अधिकारी संजय पवार यांच्या मार्गदर्शनाखाली पार पडली. कारवाईत सपोनि धरणीधर कोळेकर, पोलीस उपनिरीक्षक परमेश्वर पवार, पोलीस हेड कॉन्स्टेबल कबिरदास गायकवाड, परमेश्वर मेंगले तसेच इतर पोलीस अधिकारी व कर्मचाऱ्यांनी सहभाग घेतला. छाप्यावेळी राजपत्रित अधिकारी म्हणून पोलीस निरीक्षक ए.टी. चिंतले व मंडळ अधिकारी नरेशकुमार सुतार उपस्थित होते. पुढील तपास पोलीस उपनिरीक्षक परमेश्वर पवार करत आहेत.
दरम्यान, जिल्ह्यात बेकायदेशीर अमली पदार्थांच्या लागवडीविरोधात पोलिसांनी विशेष मोहीम हाती घेतली असून, गुप्त माहितीच्या आधारे विविध भागांत सातत्याने कारवाया सुरू आहेत. अशा प्रकारच्या बेकायदेशीर शेतीवर कठोर कारवाई सुरूच राहणार असल्याचा इशारा पोलिसांनी दिला आहे.
