माजी राज्यमंत्री सुरेश धस यांच्या तक्रारीवरून महासंचालकांनी दिले होते एसपींना आदेश
आरंभ मराठी / धाराशिव
धाराशिव नगर पालिकेतील कथ‍ित कोट्यवधी रूपयांच्या भ्रष्टाचार प्रकरणात पोलिस अधीक्षक संजय जाधव यांनी एसआयटीची (विशेष तपास पथक) नेमणूक केली असून, यामध्ये एसआयटीमध्ये अप्पर पोलिस अधीक्षक हसन गौहर, उपविभागीय पोलिस अधिकारी स्वप्नील राठोड, आर्थिक गुन्हे शाखेचे पोलिस निरीक्षक गणेश कानगुडे आणि स्थानिक गुन्हे शाखेचे पोलिस निरीक्षक वासुदेव मोरे यांचा समावेश आहे. एसआयटीने दर महिन्याला पोलिस अधीक्षकांना अहवाल सादर करावा, असे सूचित करण्यात आले आहे. दरम्यान,या तपास पथकाकडून पालिकेतील कोणकोणती प्रकरणे समोर येतात, याकडे जिल्ह्याचे लक्ष लागले आहे.
धाराशिव नगर पालिकेत अनेक प्रक्रारचे आर्थिक गैरव्यवहार झाले असून, या भ्रष्टाचाराची एसआयटीकडून सखोल चौकशी करावी, अशी मागणी माजी राज्यमंत्री सुरेश धस यांनी राज्याचे गृहमंत्री देवेंद्र फडणवीस यांच्याकडे केली होती. या मागणीवरून पोलिस महासंचालकांनी धाराशिवच्या पोलिस अधीक्षकांना पत्र पाठवून एसआयटीची नेमणूक करण्याचे आदेश दिले होते.
त्यानुसार पोलिस विभागांतर्गत एसआयटीची नेमणूक करण्यात आली आहे.धस यांच्या तक्रारीवरून यापूर्वी नगर पालिकेत अनेक प्रकरणे उघडकीस आली आहेत. तसेच त्यापैकी प्रकरणांत गुन्हेही दाखल झाले आहेत. तत्कालिन मुख्याधिकारी हरिकल्याण यलगट्टे यांच्यासह काही अधिकारी, कर्मचाऱ्यांवर कारवाया झालेल्या आहेत तर काही प्रकरणांचा तपास सुरू आहे.
सातत्याने पाठपुरावा
पालिकेतील एकंदर गैरव्यवहाराची एसआयटीमार्फत चौकशी व्हावी, त्यातून मोठी प्रकरणे समोर येतील, अशी मागणी माजी राज्यमंत्री तत्कालिन विधान परिषदेचे आमदार सुरेश धस यांनी केली होती.त्यांनी यासंदर्भात गृह विभागाकडे सातत्याने पाठपुरावा केला होता.
सखोल चौकशी करण्याचे आदेश
धस यांच्या मागणीची दखल घेण्यात आली असून, पोलिस महासंचालकांनी 5 सप्टेंबर 2024 रोजी पोलिस अधीक्षकांना एसआयटी स्थापन करण्याचे आदेश दिले होते. त्यानुसार 9 सप्टेंबर 2024 रोजी पोलिस अधीक्षक संजय जाधव यांनी एसआयटीची नेमणूक केली आहे. पालिकेत दाखल असलेल्या सर्व गुन्ह्यांचा सखोल तपास करावा, असे या विशेष पथकाला सूचित करण्यात आले आहे.
3 वर्षांपासून पालिका चौकशीच्या फेऱ्यात
धाराशिव नगर पालिकेचे तत्कालिन मुख्याधिकारी यलगट्टे यांची प्रशासकपदी नेमणूक झाल्यापासून पालिकेला ग्रहण लागले आहे. पालिकेची आर्थिक स्थिती हलाखीची झाली असून,विकासाची कामे ठप्प झाली आहेत किंबहुना मुलभूत सुविधांपासून नागरिक वंचित आहेत.दुसरीकडे भ्रष्टाचारामागून भ्रष्टाचाराची प्रकरणे उघडकीस येत असल्याने पालिका 3 वर्षांपासून चौकशीच्या फेऱ्यात आहे. आता एसआयटीच्या चौकशीमध्ये आणखी प्रकरणांचा गुंता वाढत जाणार का, हे पाहणे महत्वाचे ठरणार आहे.
