प्रतिनिधी / कळंब
कळंब तालुक्यातील मंगरूळ येथील एका गरीब कुटुंबातील किशोर पांडुरंग माळी नावाच्या होतकरू तरुणाने गावाचे नाव उज्ज्वल केले आहे. 2020 मध्ये MPSC मार्फत घेण्यात आलेल्या स्पर्धा परीक्षेत या तरुणाने घवघवीत यश संपादन केले असून, त्याची पोलीस उपनिरीक्षकपदी निवड झाली आहे.
ग्रामीण भागात कमी सुविधा असताना जिद्दीच्या जोरदार या तरुणाने मिळवलेल्या यशाचे सर्व स्तरातून कौतुक होत आहे.
किशोर माळी शेतकरी कुटुंबातले असून,त्यांची घरची परिस्थिती बेताचीच होती. वडील आणि आई शेतीवरच आपली उपजीविका भागवत तर मोठा भाऊ उद्योग व्यवसाय करून लहान भावाच्या शिक्षणास मदत करत होते. किशोरने मोठ्या हिमतीने स्वकर्तृत्वावर जिद्दीने कष्टाने अभ्यास करून यशाला गवसणी घातली.
मिळालेल्या या यशाचे सारे श्रेय किशोरने आपले आई-वडील आणि मोठे बंधू शांतलिंग यांना दिले आहे. आपला मुलगा आता पोलिसांच्या वर्दित दिसणार या कल्पनेने किशोरच्या आई वडील भावूक झाले किशोरच्या या यशाने त्याचे मित्र परिवार तसेच गावातील सर्व स्तरातून कौतुक होत आहे.
