प्रतिनिधी / शिराढोण
राष्ट्रीय विश्वगामी पत्रकार संघ संचलित राष्ट्रीय विश्वगामी शिक्षक व कर्मचारी महासंघ यांच्या वतीने दिला जाणारा अतिशय मानाचा राज्यस्तरीय आदर्श शिक्षक पुरस्कार शिराढोण येथील भूमिपुत्र तथा कळंब तालुक्यातील एकुरगा जिल्हा परिषद प्राथमिक शाळेचे उपक्रमशील शिक्षक नागेंद्र होसाळे यांना प्रदान करण्यात आला. सोलापूरच्या हरिभाई देवकरण प्रशाला मुळे सभागृहात सदरील पुरस्काराने होसाळे यांना सन्मानित करण्यात आले.
कार्यक्रमाच्या अध्यक्षस्थानी राष्ट्रीय पत्रकार संघाचे अध्यक्ष संतोष निकम, प्रमुख पाहुणे म्हणून विठ्ठल कारखान्याचे चेअरमन अभिजीत पाटील, शिक्षणाधिकारी महारुद्र नाडे, आबासाहेब आडसुळ आदींची उपस्थिती होती.होसाळे यांनी गेल्या 30 वर्षापासून शिक्षणासारख्या पवित्र क्षेत्रात शिक्षक म्हणून ज्ञानदानाचे पवित्र कार्य करताना विद्यार्थी हिताचे विविध उपक्रम शाळा स्तरावर राबवून विद्यार्थ्यांमध्ये आनंदी व उत्साही वातावरण निर्माण केले. शिक्षण क्षेत्रातील उत्कृष्ट कार्यामुळे मुलांमध्ये नवचैतन्य निर्माण झाले. शाळेत स्पर्धा परीक्षा मार्गदर्शन, शैक्षणिक साहित्य निर्मिती, लोकवाटा, पालक संपर्क, वृक्षारोपण, विद्यार्थी गुणवत्ता वाढीसाठी त्यांनी अनेक उपक्रम राबवले आहेत. तसेच शाळेच्या वेळेव्यतिरीक्त वर्षभर 365 दिवस ज्यादा तास घेतात. विद्यार्थी हितासाठी झटणाऱ्या व धडपडणाऱ्या अशा आदर्श शिक्षकाचा सन्मान व कौतुक विद्यार्थी तथा सर्व शिक्षकांमधून होत आहे. त्यांना मिळालेल्या या पुरस्काराचे सर्व स्तरांमधून कौतुक व अभिनंदन होत आहे.
