आरंभ मराठी / धाराशिव
अंमली पदार्थ विरोधी टास्क फोर्स, छत्रपती संभाजीनगर कृती विभागाने धाराशिव तालुक्यातील खेड येथे मोठी कारवाई करत अफूच्या अवैध लागवडीचा पर्दाफाश केला. या कारवाईत एकूण ८३ किलो अफूची झाडे जप्त करण्यात आली असून त्यांची अंदाजे किंमत १२ लाख ३३ हजार ४५० रुपये इतकी आहे.
या प्रकरणी चार शेतकऱ्यांविरुद्ध एन.डी.पी.एस. कायद्यान्वये गुन्हा दाखल करण्यात आला आहे.
अंमली पदार्थ विरोधी टास्क फोर्सला गोपनीय बातमीदारामार्फत माहिती मिळाली होती की, मौजे खेड, ता. जि. धाराशिव येथील काही शेतजमिनीत मानवी मेंदूवर विपरीत परिणाम करणाऱ्या अफू वनस्पतीची अवैधरित्या लागवड करण्यात आली आहे.
या माहितीच्या आधारे टास्क फोर्सने दिनांक १७ फेब्रुवारी रोजी खेड येथील गट क्रमांक १४१, १४२, १५३ व १७४ या शेतजमिनीत छापा टाकला. छापा टाकल्यानंतर संबंधित शेतजमिनीत अफूची झाडे फुल व बोंड्यासह मोठ्या प्रमाणात लागवड करून त्यांची देखभाल व देखभाल केली जात असल्याचे निदर्शनास आले.
यावेळी पोलीस पथकाने कायदेशीर पंचनामा करून सर्व झाडे उपटून जप्त केली. जप्त करण्यात आलेल्या अफू वनस्पतीचे एकूण वजन ८३ किलो असून त्यांची किंमत १२,३३,४५० रुपये इतकी असल्याचे निष्पन्न झाले. या प्रकरणी शेतकरी लिंबराज पांडुरंग लोमटे, रामहारी नामदेव लोमटे, नरहरी गोविंद लोमटे आणि ज्ञानेश्वर वसुदेव टकले (सर्व रा. खेड, ता. जि. धाराशिव) यांच्याविरुद्ध ढोकी पोलीस ठाण्यात एन.डी.पी.एस. कायदा १९८५ चे कलम ८ (क) व १८ नुसार गुन्हा दाखल करण्यात आला आहे.
या प्रकरणी सहाय्यक पोलीस उपनिरीक्षक हनुमान पुरके यांनी फिर्याद दिली आहे. ही कारवाई अंमली पदार्थ विरोधी टास्क फोर्सच्या पोलीस महानिरीक्षक श्रीमती शारदा राऊत, पोलीस उपमहानिरीक्षक प्रवीण पाटील, पोलीस अधीक्षक अजीत टिके व निकेश खाटमोडे यांच्या मार्गदर्शनाखाली पार पडली. तसेच पोलीस उपअधीक्षक साईनाथ ठोंबरे, पोलीस निरीक्षक श्रीमती गीता बागवडे, सहाय्यक पोलीस निरीक्षक दीपाली पाटील, सहाय्यक पोलीस उपनिरीक्षक वाहेद मुल्ला व हनुमान पुरके यांच्यासह टास्क फोर्सच्या पथकातील अधिकारी व कर्मचाऱ्यांनी ही कारवाई यशस्वी केली.
दरम्यान, युवा वर्ग नशेच्या आहारी जाऊ नये यासाठी अंमली पदार्थ विरोधी टास्क फोर्सची स्थापना करण्यात आली असून गांजा, अफू, ड्रग्ज यांसारख्या अंमली पदार्थांची लागवड, साठा किंवा विक्री करणाऱ्यांविरोधात कठोर कारवाई करण्यात येणार असल्याचा इशारा पोलिसांनी दिला आहे. तसेच नागरिकांनी अशा प्रकारच्या अवैध कारवायांची माहिती तात्काळ पोलिसांना देऊन सहकार्य करावे, असे आवाहन करण्यात आले आहे.
