प्रतिनिधी / शिराढोण
शिराढोण (ता.कळंब) येथील भारतरत्न अटलबिहारी वाजपेयी आंतरराष्ट्रीय शाळेतील दहावीत शिकणाऱ्या वल्लभ माडजे व गोपाल पांचाळ यांनी मुंबईत भारतीय रिझर्व बँक आयोजित राज्यस्तरीय आर्थिक साक्षरता प्रश्न मंजुषा स्पर्धेत राज्यातील 36 जिल्ह्यातून आलेल्या स्पर्धकांत तृतीय पारितोषिक पटकावले. याबद्दल सर्व शिक्षक, शिक्षकेतर कर्मचारी, शाळा व्यवस्थापन समिती, प्रशाला मुख्याध्यापक व समस्थ गावकऱ्यांनी त्यांचे कौतुक केले.
दोन्ही विद्यार्थ्यांनी यापूर्वी तालुका स्तर व जिल्हा स्तरावर प्रथम क्रमांक मिळवत राज्य स्तरीय स्पर्धेत प्रवेश मिळवला.सतत्यपूर्ण अभ्यास करण्याची तयारी, यामुळे दोघानी हे यश संपादन केले आहे. यशासाठी शाळेतील शिक्षक तसेच विद्यार्थ्यांच्या पालकांचे मार्गदर्शन लाभले. विद्यार्थ्यांच्या यशाबद्दल प्रशालेचे मुख्याध्यापक अर्जुन जाधव , शाळा व्यवस्थापन समिती अध्यक्ष शैलेंद्र यादव, उपाध्यक्ष अमोल नाईकवाडे, अशोक महाजन, गोविंद वाघमारे यांनी कौतुक केले आहे.
