हिरकणी महोत्सवाच्या पाचव्या दिवशी स्टॉलवरही वाढली गर्दी
प्रतिनिधी / धाराशिव
दिव्यांची आरास अन् फुलांच्या माळांनी सुशोभित केलेला परिसर. गीत रामायणाच्या सुरांनी भारावलेले धाराशिवकर आणि स्टॉल वर खाद्यप्रेमींची झालेली गर्दी..हे चित्र होतं लेडीज क्लबच्या मैदानावरील. बुधवारी सायंकाळी गीत रामायण कार्यक्रमाच्या निमित्ताने लेडीज क्लबचे मैदान गर्दीने खचाखच भरलेले आणि नागरिकांमध्ये प्रचंड उत्साह दिसून येत होता.
लेडीज क्लब धाराशिवने सलग ६ दिवस (दि. ५ जाने ते १० जानेवारी) आयोजित केलेल्या हिरकणी महोत्सवाला धाराशिवकरांनी प्रचंड प्रतिसाद दिला. १६१ विविध स्टॉलच्या माध्यमातून सुरू असलेल्या या महोत्सवाला धाराशिवकर भरभरून प्रतिसाद देत असल्यामुळे या स्टॉलधारकामध्येही कमालीचा उत्साह दिसून आला.
दररोज सायंकाळी आयोजित केलेल्या सांस्कृतिक कार्यक्रमांनाही भरभरून प्रतिसाद मिळाला. महोत्सवाच्या पाचव्या दिवशीचे आकर्षण म्हणजे गीत रामायण नृत्याविष्कार. संपूर्ण देश अयोध्येतील राम मंदिराच्या प्राणप्रतिष्ठापणाची आतुरतेने वाट पहात असून, या पार्श्वभूमीवर लेडीज क्लबने आयोजित केलेल्या या कार्यक्रमाला प्रेक्षक रसिकांनी अलोट गर्दी केली होती. सर्वप्रथम लेडीज क्लबच्या अध्यक्षा अर्चनाताई पाटील यांच्या हस्ते आई तुळजाभवानीची आरती करण्यात आली. यावेळी संपूर्ण लेडीज क्लब दिव्यांची आरास अन फुलांच्या माळांनी सुशोभित करण्यात आले होते. यावेळी जिल्ह्याचे नेते आणि तुळजापूरचे आमदार राणाजगजितसिंह पाटील यांच्या हस्ते दीप प्रज्वलन करण्यात आले आणि सलग सहा दिवस लेडीस क्लबने आयोजित केलेल्या या कार्यक्रमात आमदार राणाजगजितसिंह पाटील यांनी प्रोत्साहन देऊन महत्त्वाची भुमिका बजावल्याबद्दल त्यांचा लेडीज क्लबच्या वतीने सत्कार करण्यात आला.
परचुरे यांचा सत्कार
ग.दि.माडगूळकर यांच्या सुमधुर गीतावर गीतकार सुधीर फडके यांच्या आवाजातील सादर केलेल्या गीतरामायण नृत्याविष्काराने संपूर्ण धाराशिवकरांची मने जिंकली. रामायणातील एक एक भावस्पर्शी प्रसंग सर्व रसिक तन्मयतेने पाहत होते. एक आजरामर कलाकृती लेडीज क्लबच्या माध्यमातून पाहायला मिळाल्यामुळे अनेकांनी आनंद व्यक्त केला. या नृत्याविष्कारात प्रमुख भूमिका सादर करणारे कलाकार आणि गीतरामायनाच्या दिग्दर्शक सोनिया परचुरे यांचा आमदार राणाजगजितसिंह पाटील आणि लेडीज क्लबच्या अध्यक्षा अर्चनाताई पाटील यांच्या हस्ते प्रभू श्रीरामचंद्रांची मुर्ती देऊन सन्मान करण्यात आला.
यावेळी उपस्थित सर्व महिलांनाही प्रभू श्रीरामचंद्रांची मुर्ती आणि आई तुळजाभवानी मातेची विविध रुपे असलेली दिनदर्शिका भेट म्हणून देण्यात आली. यावेळी बोलताना लेडीज क्लबच्या अध्यक्षा अर्चनाताई पाटील म्हणाल्या, लेडीज क्लब आयोजित हिरकणी महोत्सवच्या माध्यमातून अनेकींना व्यासपीठ मिळाल्यामुळे त्यांनी आपल्या उद्योगामध्ये प्रगती करावी, त्यांचे यश पाहून आपल्याला नक्कीच आनंद होईल.
