आमदार राणा जगजितसिंह पाटील यांची शेतकऱ्यांना माहिती, जिल्ह्यासह देशातील शेतकऱ्यांसाठी शासनाचा प्रयत्न
आरंभ मराठी / धाराशिव
खरीप 2023 मध्ये पीक विमा भरलेल्या सर्व शेतकऱ्यांना 25 % अग्रीम भरपाई मिळाली असून, इतर 25 महसूल मंडळातील शेतकऱ्यांना नुकसानीप्रमाणे विमा मिळाला आहे. मात्र 32 मंडळातील शेतकरी अद्याप वंचित असून 15 ऑगस्टनंतर दिल्लीत त्यासंबंधी बैठक घेण्यात येणार आहे. त्यामुळे जिल्ह्यातील आणि देशातील कोट्यवधी शेतकऱ्यांनाही त्याचा लाभ मिळवुन देण्यासाठी प्रयत्न आहे. उपमुख्यमंत्री देवेंद्र फडणवीस यांच्या माध्यमातून देशाचे कृषी मंत्री शिवराजसिंह चौहान यांच्याशी बोलणे झाले असून, त्यासाठी आपण सातत्याने पाठपुरावा करीत असल्याचे आमदार राणाजगजितसिंह पाटील यांनी सांगितले.
आमदार राणाजगजितसिंह पाटील म्हणाले, जिल्हयातील विकास कामांसाठी केंद्र व राज्य सरकारच्या माध्यमातून मोठ्या प्रमाणात निधी उपलब्ध करून देण्यात येत आहे. शेतकऱ्यांना केवळ एक रूपयात पीकविमा देण्याची योजना सरकारने आणली. यामुळे एकट्या कोंड गावातील शेतकऱ्यांचे या योजनेमुळे जवळपास १५ लाख रूपये राज्य शासनाने वाचविले आहेत. शाश्वत सिंचनासाठी साडे अकरा हजार कोटी रूपयांचा निधी कृष्णा मराठवाडा प्रकल्पास मंजूर करण्यात आला आहे. संपूर्ण जिल्ह्याची ओळख बदलणाऱ्या या प्रकल्पाचा पहिला टप्पा काही दिवसांत पूर्णत्वास जाणार आहे. माजी मंत्री डॉ. पद्मसिंह पाटील यांच्या दूरदृष्टीमुळेच असे प्रकल्प मार्गी लागत आहेत. राज्य शासनाकडून हे प्रकल्प प्राधान्याने पूर्णत्वास नेले जात आहे. यामुळे जिल्ह्याची नवी ओळख निर्माण होऊ शकेल, असे मतही आमदार पाटील यांनी व्यक्त केले.
यावेळी ॲड. रामेश्वर शेटे, माजी सभापती दत्ता देवळकर, बाळासाहेब खांडेकर, ग्रा.प. सदस्य राहुल जाधव, संजय पाटील, अनुरथ भोसले, अशोक भूमकर, बाळु गिरी, दत्ता गायकवाड, प्रवीण शेटे, विश्वास पाटिल, उमाकांत भुमकर, विष्णु लोंढे, शंकर सर्जे, महादेव जाधव, सुमित पाटील, किशोर सर्जे यांच्यासह गावातील नागरिक मोठ्या संख्येने उपस्थित होते.
विरोधकांनाही विचारा, लाडकी बहीण योजनेचा अर्ज भरला का ?
गावातील आपल्या विरोधकांना विचारा लाडकी बहीण योजनेचा अर्ज भरला की नाही? अनेकांनी तो भरला असेलच. याचा अर्थ राज्य सरकारने सुरू केलेल्या योजनेवर आपल्या विरोधकांचाही विश्वास आहे. मागील अनेक वर्षांपासून मध्य प्रदेशमध्ये ही योजना यशस्वीपणे सुरू आहे. आपल्या कडेही ती यशस्वी होणार आहे. योजनेला मिळणारा प्रतिसाद सर्व काही स्पष्ट करणारा असल्याचेही आमदार पाटील म्हणाले.
