प्रतिनिधी / मुंबई
मराठा आरक्षणासाठी राज्यात आंदोलन सुरू झाल्यापासून ओबीसी प्रवर्गातून मराठ्यांना आरक्षण देण्यास तीव्र विरोध करणारे आणि मराठा योद्धा मनोज जरांगे यांच्यावर सडकून टीका करणारे मंत्री छगन भुजबळ जणू भाजपशी सुसंगत भूमिका घेत आहेत. त्यामुळेच त्यांच्यावरील इडीने दाखल केलेली याचिका मागे घेतली आहे. एकप्रकारे भाजपने त्यांना यानिमित्ताने शाबासकी दिली असल्याची चर्चा सुरू आहे.
मंत्री छगन भुजबळ आणि त्यांचा पुतण्या समीर यांच्याविरोधात दाखल केलेली याचिका मागे घेत असल्याचे सक्तवसुली संचालनालयाने (ईडी) नुकतेच उच्च न्यायालयात सांगितले.
महाराष्ट्र सदन घोटाळ्यातील आर्थिक गैरव्यवहारप्रकरणी छगन भुजबळ आणि त्यांच्या कुटुंबातील काही सदस्यांना ईडीने २०१६ मध्ये अटक केली होती. त्यानंतर, दोन वर्षांनी या प्रकरणी उच्च न्यायालयाने भुजबळ यांना जामीन मंजूर केला होता. दुसरीकडे, विशेष न्यायालयानेही १६ ऑक्टोबर रोजी भुजबळ यांना पारपत्र नूतनीकरणाची परवानगी देऊन परदेशात जाण्याची परवानगी दिली होती. या निर्णयाला ईडीने २०१८ मध्ये उच्च न्यायालयात आव्हान दिले होते.
इडीला प्रकरण आठवेना
भुजबळ सत्तेत सहभागी झाल्यानंतर म्हणजे सप्टेंबर महिन्यात सुनावणीदरम्यान याचिका नेमकी कशासाठी केली होती हे आठवत नसल्याचे आणि याचिकेची प्रत सापडत नसल्याचे ईडीच्या वतीने न्यायालयाला सांगितले होते. न्यायालयानेही या दाव्याबाबत आश्चर्य व्यक्त केले होते. तसेच, याचिका नेमकी कशासाठी केली हे स्पष्ट करण्यासाठी न्यायालयाने ईडीला वेळ दिला होता.
याचिका मागे घेण्याची परवानगी
न्यायमूर्ती आर. एन. लढ्ढा यांच्या एकलपीठापुढे या प्रकरणी नुकतीच सुनावणी झाली. त्यावेळी, भुजबळ आणि समीर यांच्याविरोधात दाखल केलेली याचिका मागे घेण्यात येत असल्याचे ईडीच्या वतीने सांगण्यात आले. तसेच ही याचिका मागे घेण्यास परवानगी देण्याची मागणी केली. न्यायालयानेही ईडीची मागणी मान्य केली.
