आरंभ मराठी / धाराशिव
धाराशिवसारख्या ग्रामीण भागातील नवतरुणांनी उद्योग आणि व्यवसायाच्या क्षेत्रात स्वतःच्या क्षमता विकसित करून नव्या संधी निर्माण कराव्यात, असे आवाहन सहकारमंत्री बाबासाहेब पाटील यांनी केले.
शहरातील येडशी रोडलगत सुरू करण्यात आलेल्या ग्रँड शिफ्ट मोटर्स या वाहनांच्या शोरुमचे उद्घाटन रविवारी सहकारमंत्री बाबासाहेब पाटील यांच्या हस्ते झाले. यावेळी ते बोलत होते.
हर्षद देशमुख आणि त्यांच्या मित्र परिवाराने सुरू केलेल्या या व्यवसायाचे कौतुक करताना पाटील यांनी तरुणांनी पारंपरिक व्यवसायांबरोबरच नव्या क्षेत्रातही पाऊल टाकण्याची गरज व्यक्त केली.
कार्यक्रमाला खासदार ओमराजे निंबाळकर, आमदार सतीश चव्हाण, आमदार दिलीप सोपल, माजी नगराध्यक्ष मकरंद राजे निंबाळकर, राष्ट्रवादी काँग्रेस शरद पवार पक्षाचे जिल्हाध्यक्ष डॉ. प्रतापसिंह पाटील, सुरेश बिराजदार, शिवसेनेचे नेते सूरज साळुंखे, नगरसेवक नाना घाटगे यांच्यासह शहरातील विविध क्षेत्रांतील मान्यवर उपस्थित होते.
दरम्यान, चारचाकी वाहनांना दुरुस्ती व देखभालीद्वारे नव्या स्वरूपात आणून त्यांचा पुनर्वापर आणि पुनर्विक्री करण्याचा व्यवसाय वाढत आहे. याच संदर्भाचा राजकीय क्षेत्राशी संबंध जोडत आमदार दिलीप सोपल यांनी मिश्कील टिप्पणी केली. जुन्या आणि मागे पडलेल्या नेत्यांनाही निवडणुकीच्या काळात चकाकी देऊन पुन्हा पुढे आणले जाते, असे ते म्हणाले.कार्यक्रमाचे प्रास्ताविक डॉ. रमेश दापके – देशमुख यांनी केले. सूत्रसंचलन वैभव आगळे यांनी तर आभार प्रा.सोमनाथ लांडगे यांनी मानले.
ग्रँड शिफ्ट मोटर्सच्या माध्यमातून धाराशिव शहरात वाहनांच्या खरेदी-विक्रीसाठी नवे व्यासपीठ उपलब्ध झाले आहे.
