आरंभ मराठी / वाशी
वाशी तालुक्यातील बावी गावातील पारधी पेढीवर तिघांची हत्या झाल्याची धक्कादायक घटना समोर आली आहे.
ही घटना रविवारी दि.५) रात्री नऊ वाजण्याच्या सुमारास बावी येथील पारधी पेढिवर घडली. हत्या झालेल्या तीनही व्यक्ती एकाच कुटुंबातील असल्याचे समजते.
याप्रकरणी मिळालेल्या माहितीनुसार शेतीला पाणी देण्यासाठी मोटार चालू करण्याच्या कारणावरून वाद सुरू झाला होता. वादाचे रूपांतर भीषण हाणामारीत झाले.
दगड, गोटे आणि लाठी काठ्यांनी झालेल्या हाणामारीत रात्री तीन जणांचा जीव गेला. किरकोळ कारणावरून सुरू झालेला हा वाद दोन गटात तुंबळ हाणामारीपर्यंत पोहोचला.
दोन्ही बाजूंनी एकमेकांवर दगडफेक करण्यात आली. यामध्ये सुनील काळे, अप्पा काळे व वैजीनाथ काळे या तिघांचा मृत्यू झाला. यामध्ये दोन व्यक्ती गंभीर जखमी झाल्या आहेत.
त्यातील एकाची परिस्थिती चिंताजनक असल्याचे समजते. या घटनेची माहिती मिळताच येरमाळा पोलिसांनी घटनास्थळी धाव घेत तपास सुरू केला.
सध्या येरमाळा पोलीस ठाण्यात गुन्हा दाखल करण्याची प्रक्रिया सुरू असून, पोलीस अधिक तपास करत आहेत.
