आरंभ मराठी / धाराशिव
मराठा योद्धा मनोज जरांगे- पाटील यांच्यावर प्रचंड टीका करून आज दिवसभर चर्चेत राहिलेले अजय महाराज बारस्कर यांच्यावर प्रहार जनशक्ती पक्षाने बडतर्फीची कारवाई केली आहे तसेच त्यांच्या या भूमिकेला पक्षाचा पाठिंबा नाही, असेही स्पष्ट करण्यात आले आहे. यापुढे कोणत्याही आरक्षणासंदर्भात कोणीही भूमिका मांडू नये असे पदाधिकाऱ्यांना स्पष्ट बजावण्यात आले आहे.
अजय महाराज बारस्कर यांनी मुंबईतील पत्रकार परिषदेत म्हणून जरांगे पाटील यांच्यावर अनेक गंभीर आरोप केले असून त्यामुळे बारस्कर महाराज आज दिवसभर चर्चेत आहेत बारस्कर महाराज हे प्रहार जनशक्ती पक्षाचे पदाधिकारी असून वारकरी संघटनेचे महत्त्वाचे पद त्यांच्याकडे असल्याने अर्थातच प्रहार पक्षाची देखील हीच भूमिका आहे का असा प्रश्न विचारण्यात येत होता या पार्श्वभूमीवर पक्षाचे कार्याध्यक्ष बल्लू उर्फ महेंद्र जवंजाळ यांनी याबाबत स्पष्टीकरण देतानाच अजय महाराज बारस्कर यांची पक्षातून हकालपट्टी करण्यात आल्याचे जाहीर केले आहे.
त्यांनी म्हटले आहे की,
सर्व पदाधिकारी व कार्यकर्त्यांना सुचित करण्यात येते की, प्रहार जनशक्ती पक्षाचे संस्थापक अध्यक्ष बच्चूभाऊ कडू यांचा आदेश आहे की, पक्षामध्ये कोणीही मनोज जरांगे पाटील यांच्या नेतृत्वात सुरु असलेल्या मराठा आरक्षणाविषयी किंवा इतर आरक्षण किंवा नेत्यांबद्दल कोणतीही भूमीका मांडू नये, असे केल्यास त्या व्यक्तीचा प्रहार जनशक्ती पक्षाशी काहीही संबध राहणार नाही.
पक्षाची अधिकृत भुमिका पक्षाचे संस्थापक अध्यक्ष बच्चूभाऊ कडू हेच स्वतः मांडतील. इतर कोणीही अध्यक्षांच्या मान्यतेशिवाय आपली भूमिका मांडू नये. आज २१/०२/२०२४ रोजी अजय महाराज बारस्कर यांनी जी भूमिका मनोज जरांगे पाटील यांचेविषयी मांडली त्या संदर्भात प्रहार जनशक्ती पक्ष किंवा प्रहार वारकरी संघटना समर्थन करत नाही किंवा काहीही संबध नाही.
तसेच अजय महाराज बारस्कर यांना प्रहार जनशक्ती पक्ष व प्रहार वारकरी संघटनेमधून बडतर्फ करण्यात येत आहे. त्यांचा पक्षाशी आजपासून काहीही संबध राहणार नाही, याची नोंद घ्यावी.
